20.12.2025 | 20:00
100,000 ռուբլի՝ ՀՀ-ում լրտեսության համար․ ՌԴ քաղաքացիները Հայաստանում տվյալներ են հավաքել․ ՏԵՍԱՆՅՈՒԹ
ՀՀ ռազմական ծախսերը 2020 թ. նվազել են, Ադրբեջանինը՝ ավելացել․ SIPRI-ն նոր զեկույց է հրապարակել
Քաղաքականություն
26.04.2021 | 12:42
Ստոկհոլմի Խաղաղության խնդիրների հետազոտության միջազգային ինստիտուտը՝ SIPRI-ն հրապարակել է նոր զեկույց՝ 2020 թվականին աշխարհում ռազմական ծախսերի վերաբերյալ։ Զեկույցում նշվում է, որ ռազմական ծախսերն աշխարհում կազմել են շուրջ 2 տրիլիոն դոլար, ինչը 2,6% -ով ավելին է նախորդ տարվա համեմատ։
«2020 թվականին համաշխարհային ռազմական ծախսերն աճել են 2,6%-ով, մինչդեռ համաշխարհային համախառն ներքին արդյունքը (ՀՆԱ) նվազել է 4,4%, հիմնականում COVID-19 համաճարակի տնտեսական ազդեցության պատճառով», – ասված է SIPRI- ի զեկույցում։
Զեկույցում համեմատական է տարվել Հայաստանի ու Ադրբեջանի ռազմական ծախսերի միջև։ Դրանում նշվում է, որ 2020 թվականին Ադբեջանը մեծացրել է իր ռազմական ծախսերը 17 տոկոսով, ինչն ամենամեծն է Արևելյան Եվրոպայում։ Նշվում է, որ ռազմական ծախսերի ավելացումը մեծապես կախված է եղել տարածաշրջանում Հայաստանի ու Ադրբեջանի միջև հակամարտության հետ։ Նշվում է, ի հակադրություն Ադրբեջանի՝ ՀՀ ռազմական ծախսերը 2020 թվականին նվազել են 2,6 տոկոսով։
Նշվում է, որ Ադրբեջանը իր ՀՆԱ-ի 5,4 տոկոսը ծախսել է ռազմական ոլորտի վրա, իսկ Հայաստանը՝ 4,9 տոկոսը։
Համաձայն զեկույցի՝ ամենամեծ ռազմական ծախսերը կատարող երկիրը ԱՄՆ-ն է եղել: Անցյալ տարի այս ցուցանիշն աճել էր 4,4% -ով և կազմել 778 մլրդ դոլար:
Ինստիտուտի գնահատականի համաձայն՝ Չինաստանն ու Հնդկաստանը գրավել են երկրորդ և երրորդ տեղերը: 2020 թվականին Չինաստանի ռազմական ծախսերն աճել են 1,9% -ով և կազմել 252 միլիարդ դոլար, մինչդեռ Հնդկաստանի ծախսերը կազմել են 72,9 միլիարդ դոլար:
Ռուսաստանը 4-րդ հորիզոնականում է։ ՌԴ ռազմական ծախսերը 2020 թվականին կազմել են 61,7 միլիարդ դոլար, ինչը 2,5 տոկոսով ավելին է, քան 2019 թվականին:
Հինգերորդ տեղը զբաղեցրել է Միացյալ Թագավորությունը, որի սպառազինության ծախսերը 2020 թվականին կազմել են 59,2 միլիարդ դոլար, ինչը 2,9 տոկոսով ավելին է, քան նախորդ տարի:
Տաթև Ֆռանգյան
