ԱՄՆ-ն Թուրքիային պաշտոնապես տեղեկացրել է F-35 կործանիչների ծրագրից հեռացնելու մասին

ԱՄՆ-ն պաշտոնապես Թուրքիային տեղեկացրել են, որ Անկարային դուրս են հանել F-35 կործանիչների ծրագրից։ Այս մասին գրում է Ahval գործակալությունը։

Վաշինգտոնը Թուրքիային հեռացրեց F-35 կործանիչների ծրագրից այն բանից հետո, երբ 2019 թվականին Թուրքիան գնեց ռուսական S-400 համակարգեր, որոնք սպառնալիք են ԱՄՆ-ի ու ՆԱՏՕ-ի համակարգերի համար։ Սակայն թուրքերը շարունակում են մասեր արտադրել 5-րդ սերնդի կործանիչների համար, չնայած երկիրը հանվել է ծրագրից ու դեկտեմբերին ԱՄՆ-ն պատժամիջոցներ է կիրառել թուրքական ռազմարդյունաբերական նախագահության նկատմամբ։

Պենտագոնի պաշտոնյան էլ ասել է, որ Վաշինգտոնը նոր համաձայնագիր է ստորագրել 8 այլ կողմերի հետ՝ 2006թ․ հուշագրի չեղարկումից հետո։

Պենտագոնի խոսնալ Ջեսիկա Մաքսվելը Ahval-ին ուղարկած էլեկտրոնային նամակում չի հաստատել լուրը, սակայն նշել է, որ իրենց տեսակետը չի փոխվել։

«S-400-ն անհամատեղելի է F-35-ի հետ, և Թուրքիան կասեցվել է ծրագրից։ Մենք շարունակում ենք Թուրքիային պաշտոնապես F-35-ի ծրագրից հեռացնելու գործընթացը, որը հայտարարվել է 2019-ի հուլիսին»,- ասվում է նամակում։

Պաշտոնյան ասել է, որ ԱՄՆ-ն, Միացյալ Թագավորությունը, Իտալիան, Նիդերլանդները, Կանադան, Ավստրալիան, Նորվեգիան ու Դանիան կնքել են նոր համաձայնագիրը, որից տեղյակ է նաև Անկարան։

Թուրքիան պլանավորում էր գնել 100 հատ F-35, սակայն ԱՄՆ-ն հրաժարվեց մատակարարել չորս պատրաստի ինքնաթիռները՝ Անկարային ծրագրից հեռացնելուց հետո։ Անկարան հիմա աշխատում է ծրագիր վերադառնալու ուղղությամբ՝ տարեսկզբին Վաշինգտոնում լոբբիստներ վարձելով։

Էմմա Չոբանյան