11.10.2026 | 20:00
15 հազար մարդ Հայաստան է գալիս․ ի՞նչ է սպասվում COP17-ում․ բնությունը մարդուց պաշտպանելու ՇԵՐՏԵՐԸ
Արցախում ռուս խաղաղապահները մայիսի 9-ին շքերթի են պատրաստվում․ Բաքվուն սա «օկուպացիոն գործողություն» են որակել
Քաղաքականություն
22.04.2021 | 20:42
Լեռնային Ղարաբաղում գտնվող ռուս խաղաղապահները պատրաստվում են մայիսի 9-ին Երկրորդ համաշխարհային պատերազմում հաղթանակի օրվան նվիրված շքերթ անցկացնել։ Այս մասին հաղորդել է ՌԴ Պաշտպանության նախարարությունը։ Նշվում է, որ Ստեփանակերտի օդանավակայանում նաև փորձ է անցկացվել, որում ներգրավված է եղել շուրջ 400 ռուս զինծառայող։
Նշենք, որ հայկական կողմը դեռ չի արձագանքել այս տեղեկությանը, մինչդեռ Ադրբեջանում այն բուռն քննարկումների առիթ է դարձել ու դժգոհություններ առաջացրել։
Մասնավորապես, «Թուրան»-ի հետ զրույցում Մեջլիսի միջազգային հարաբերությունների ու միջխորհրդարանական կապերի կոմիտեի անդամ Սաբիր Ռուստամխանլին նշել է, որ ռուս խաղաղապահները ԼՂ-ում են՝ խաղաղություն ստեղծելու, և ոչ թե շքերթներ անցկացնելու համար։
«Ռուս խաղաղապահները գիտեն, որ իրենց ձեռնարկած յուրաքանչյուր անհարկի քայլ անվստահություն է առաջացնում Ադրբեջանում։ Դրա համար նրանց քայլերն անընդունելի են»,- ասել է նա։
Քաղաքագետ Շահին Ջավարլին էլ նշել է, որ ռուս խաղաղապահների կարգավիճակը միանշանակ չէ, և այն պետք է հստակեցվի։ Ըստ նրա՝ հիմնական խնդիրը դա է, որտեղից էլ բխում են մյուսները, այդ թվում՝ շքերթի անցկացումը։ Ընդդիմադիր «Մուսավաթ» կուսակցության մամուլի ծառայությունն էլ շքերթի անցկացումը որակել է «Ադրբեջանի ինքնիշխանության խախտում»։
«Այդ գործողությունները հակասում են խաղաղապահ ուժերի մանդատին, միջազգային իրավունքին ու ապացուցում են Ղարաբաղում Ռուսաստանի գործողությունների օկուպացիոն բնույթը։ Պաշտոնական Բաքուն պետք է քայլեր ձեռնարկի ինքնիշխանության ու տարածքային ամբողջականության պահպանման համար»,- ասվում է հայտարարության մեջ։
Նշենք, որ սոցիալական ցանցերի ադրբեջանական տիրույթում շքերթի անցկացման լուրը ևս մեծ դժգոհություններ է առաջացրել։
Բաքուն, սակայն, պաշտոնապես դեռևս չի արձագանքել շքերթի անցկացմանը։
Էմմա Չոբանյան
