Ինչպես է ԼՂ պատերազմն ազդել ՀՀ-ում մամուլի ազատության վրա․ «Լրագրողներ առանց սահմանների» կազմակերպության զեկույցը

«Լրագրողներ առանց սահմանների» կազմակերպությունն այսօր հրապարակել է մամուլի ազատության մասին իր համաշխարհային զեկույցը, որում «Արևելյան Եվրոպայի և Կենտրոնական Ասիայի» տարածաշրջանն այս տարի գտնվում է նախավերջին հորիզոնականում՝ կորոնավիրուսի դեմ պայքարի պատրվակով սահմանված սահմանափակումների, զանգվածային բողոքի ցույցերը լուսաբանող լրատվամիջոցների աշխատակիցների վրա հարձակումների ավելացման և առնվազն 7 լրագրողի մահվան պատճառ դարձած Լեռնային Ղարաբաղի պատերազմի պատճառով։

Զեկույցում Հայաստանն այս տարի զբաղեցնում է 63-րդ հորիզոնականը (-2 հորիզոնական)։ Դրանում նշվում է, որ ՀՀ-ում լրատվամիջոցների բազմազանությունն ավելացել է, սակայն 2018-ի գարնանը Հայաստանում «թավշյա հեղափոխությունից» հետո կառավարությունը չի կարողացել կրճատել լրատվամիջոցների բևեռացումը: Նշվում է, որ հիմնական հեռուստաընկերությունների խմբագրական քաղաքականությունը համընկնում է դրանց տերերի շահերի հետ:

«Լրատվամիջոցների սեփականատերերի թափանցիկությանն ու լրագրողական անկախությանը հասնելը դեռ շատ հեռու են: Լրագրողների անկախությունն էլ ավելի սահմանափակվեց 2020 թ. սեպտեմբերի 27-ին հայտարարված արտակարգ դրության ժամանակ, երբ Լեռնային Ղարաբաղում պատերազմ սկսվեց՝ հարևան Ադրբեջանի հետ վիճելի տարածքների համար: Միևնույն ժամանակ, լրագրողները շարունակվում են թիրախավորվել որոշակի քաղաքական խմբերի կողմից, ինչպես եղավ, երբ «Ազատություն» ռադիոկայանի տարածքը հարձակման ենթարկվեց նոյեմբերի 10-ին՝ հրադադարից անմիջապես հետո: Մտահոգության տեղիք են տալիս լրագրողների դեմ դատական գործընթացների քանակն ու կեղծ լուրերի դեմ պայքարում ավելորդությունները: Ապատեղեկատվության դեմ պայքարում անվտանգության ծառայությունների ներգրավվածությունը և առանց քաղաքացիական հասարակության և լրագրողների հետ նախնական քննարկման նոր օրենքներ ընդունելու փորձերը տագնապալի են: Սակայն առցանց հետաքննական լրագրությունը ծաղկում է և լավ տեղ է զբաղեցնում կոռուպցիայի դեմ պայքարում»,- ասված է զեկույցում:

Տաթև Ֆռանգյան