21.12.2025 | 22:02
Ֆուտզալի Հայաստանի հավաքականը հաղթեց Մոլդովային
Արցախի ԱԻՊԾ փոխտնօրենի պաշտոնից այսօր ազատված Բորիս Ավագյանը հրավիրվել է ԱԱԾ
Քաղաքականություն
19.04.2021 | 23:28
Դեռևս չեմ պարզել՝ ինչու են ինձ ազատել Արցախի ԱԻՊԾ փոխտնօրենի պաշտոնից, հրամանին ծանոթ չեմ։ Այս մասին Factor TV-ի հետ զրույցում ասաց Բորիս Ավագյանը՝ հավելելով, որ պաշտոնից ազատվելուց հետո հրավիրվել է ԱԱԾ։
«Առանց ծանուցագրի ինձ կանչել էին, փաստաբաններիս հետ գնացի, ԱԱԾ-ից ասացին՝ լավ, այսօր ուշ է, վաղը կգաք։ Փաստաբաններս հորդորեցին, որ ծանուցագիր ուղարկվի»,- մանրամասնեց Ավագյանը։
Նրա խոսքով՝ կառույցը հրավիրել էր զրույցի։ Ավագյանն ասաց՝ այսօր ՀՀ Ազգային ժողովում անկախ պատգամավորների կողմից կազմակերպված քննարկմանն ինքն ընդգծել է, որ եկել է աշխատանքային հանդիպման․ «Ես շեշտել եմ, որ պետք չէ քաղաքականացնել քննարկվող հարցը և հաշվում եմ, որ որպես քաղաքացի պարտավոր էի գալ և աջակցել պատգամավորներին՝ հասկանալու, թե ինչու չի լուծվում գերիների խնդիրը»։
Հարցին՝ չի՞ զղջում, որ քննարկմանը սուր ելույթով է հանդես եկել, որին հաջորդեց իր պաշտոնանկության վերաբերյալ որոշումը, Ավագյանը պատասխանեց. «Ինչո՞ւ պետք է զղջամ։ Ես իմ ծառայությունն Արցախում իրականացրել եմ որպես օգնություն՝ առանց վարձատրության, և եթե Արցախի նախագահն ու ՆԳ նախարարը կարծում են՝ իմ օգնության կարիքը չկա, խնդիր չկա։ Պատգամավոր Արթուր Մանուկյանն իմ ընկերն է, բայց կարծում եմ՝ ես պետք է ասեի, որ որպես պատգամավոր՝ իր կողմից ավելորդ է եղել գերիների հարազատներին ուղղորդել ՌԴ դեսպանատուն և այդ մասին քննարկման ժամանակ ասացի»։
Բորիս Ավագյանը շեշտեց՝ գերիների հարցով ռացիոնալ խնդրի լուծում պետք է ստանանք։
Հիշեցնենք, որ Ավագյանն այսօր ազատվել է ԱՀ ԱԻՊԾ փոխտնօրենի պաշտոնից՝ խորհրդարանում ունեցած ելույթից հետո։ Արցախի Արտակարգ իրավիճակների պետական ծառայության տարածած հայտարարության մեջ նշվում էր, թե չեն կիսում Բորիս Ավագյանի արտահայտած մտքերի ու կարծիքների մեծ մասը։ Ավագյանը մինչ այս հանդիսանում էր նաև Արցախի նախագահի հատուկ հանձնարարություններով ներկայացուցիչը՝ հասարակական հիմունքներով, և զբաղվում էր գերիների խնդրին առնչվող աշխատանքներով։ Այդ աշխատանքից նա ազատվել էր մարտին։
Մերի Մարտիրոսյան
