18.01.2026 | 21:30
Վահագն Խաչատուրյանն այցելել է Ժնևի Սուրբ Հակոբ եկեղեցի
Միանձնյա գործելո՞ւ, թե՝ կարծիքներ լսելու համար եք մեղադրում, կողմնորոշվե՛ք․ Լենա Նազարյանը՝ ԼՀ-ին. ՏԵՍԱՆՅՈՒԹ
Քաղաքականություն
16.04.2021 | 11:24
Պատերազմի պատճառների և ընթացքի վերաբերյալ խոսակցության մեջ ամենամեծ բարդությունն այն է, որ մեղադրական բնույթի հարցեր տվողները հակասում են իրենք իրենց: Այս մասին ԱԺ-ում հայտարարեց ԱԺ փոխնախագահ Լենա Նազարյանը՝ Կառավարության ծրագրի 2020 թ. կատարման արդյունքների մասին զեկույցի քննարկմանն անդրադառնալով ընդդիմադիրների ելույթներին ու հարցադրումներին: Նա որպես օրինակ բերեց Գևորգ Գորգիսյանի՝ ՀՀ վարչապետին ուղղած հարցը, երբ պատգամավորը հետաքրքրվում էր, թե ինչո՛ւ է վարչապետը շարժվել գեներալների ասածով և միանձնյա որոշումներ չի կայացրել: Նազարյանը օրինակ բերեց նաև ԼՀԿ-ական մեկ այլ պատգամավորի հարց՝ նոյեմբերի 9-ի հայտարարությունը միանձնյա ստորագրելու և ոչ մեկի կարծիքի վրա չհենվելու մասին:
«Հիմա բոլորովին չվիճարկելով ընդդիմության՝ քաղաքական մեղադրանքներ ներկայացնելու իրավունքը՝ ուզում եմ հարցնել. հարգելի՛ գործընկերներ, ինչո՞ւմ եք մեղադրում՝ միանձնյա գործելո՞ւ, թե՞ կարծիքներ հաշվի առնելու համար: Այսկերպ բացարձակ չեք օգնում, որ պատերազմի և դրա ընթացքի պատճառները հասկանալի դառնան: Մի ուրիշ դրվագով, նոյեմբերի 9-ից հետո «Իմ քայլը» խմբակցությունից դուրս եկած պատգամավորը մեզ ասում է՝ պարտությունը ձերն է. որ ինքը պարտվելու ամբողջ ընթացքում խմբակցության անդամ էր, իհարկե մոռանում է»,- նշեց Նազարյանը:
Նազարյանն անդրադարձավ նաև «Լուսավոր Հայաստան» խմբակցության ղեկավար Էդմոն Մարուքյանին: Ըստ ԱԺ փոխնախագահի՝ կա հնարավորություն, որ Մարուքյանն անձամբ լսի ԳՇ նախկին պետ Օնիկ Գասպարյանի՝ Անվտանգության խորհրդի նիստում ելույթի ձայնագրությունը և ստուգի՝ ինչ է խոսվել Անվտանգության խորհրդի նիստերում: «Բայց Մարուքյանն ասում է՝ ո՛չ, որ ծանոթանամ, ի՞նչ եմ ձեզ ասելու:
Պարո՛ն Մարուքյան, մեզ ոչ մի բան մի՛ ասեք, բայց կարող է վարչապետից բացի այլոց գործողությունների կամ անգործության մասին էլ ձեզ մոտ հարցեր առաջանան: Չեք ուզում իմանալ ճշմարտությունը, որովհետև ուզում եք շարունակել մեղադրել մի հոգու: Որովհետև եթե պարզվի, որ այդ մի հոգին չի մեղավոր կամ միայն այդ մի հոգին չի մեղավոր, ստիպված լինեք կա՛մ լռել, կա՛մ ընդունել, որ պատմության մեջ կան այլ դերակատարներ»,- նշեց Նազարյանը:
