18.11.2024 | 18:20
Արմեն Դանիելյանը հրաժարվել է ԲԴԽ նախագահի ԺՊ լինել․ Խորհրդի նախագահի պարտականությունները կկատարի Կարեն Թումանյանը
Երթուղայինում սպանել են ուղևորին, որը պահանջել է դիմակ կրել․ սպանություն գործած անձը դիմել է փախուստի
Հասարակություն
14.04.2021 | 13:38
Այսօր ժամը 11։30-ի սահմաններում Պարոնյան-Լեո փողոցների խաչմերուկում՝ թիվ 54 երթուղին սպասարկող «Գազելում» սպանություն է տեղի ունեցել։
Դեպքի վայրում հավաքված քաղաքացիները հրաժարվում էին տեսախցիկի առջև խոսել, բայց որոշ մանրամասներ հայտնեցին։
Ըստ նրանց փոխանցած տեղեկության՝ սպանության պատճառը եղել է այն, որ սպանվածը երթուղու մեջ նստած մեկ այլ քաղաքացու խնդրել է, որ պաշտպանիչ դիմակ դնի։ Ծագել է վիճաբանություն և դիմակ չկրող ուղևորն իր մոտ եղած դանակով հարվածել է դիմակ կրել պահանջող ուղևորի կրծքավանդակին, ապա դիմել փախուստի։ Ըստ ականատեսների սպանված ուղևորը մոտ 40 տարեկան տղամարդ է։
Թե քանի ուղևոր է եղել երթուղայինում, մեզ չփոխանցեցին, տեղում աշխատող ոստիկանները նշեցին, որ առաջիկայում նոր մանրամասներ կհրապարակի Քննչական կոմիտեն։
Մեր նկարահանման պահին դեպքի վայրի զննություն էր կատարում Հայաստանի քննչական կոմիտեի Երևան քաղաքի քննչական վարչության Կենտրոն և Նորք Մարաշ վարչական շրջանների քննչական բաժնի խումբը։
Ոստիկաններն ու քննիչները թույլ չտվեցին զրուցել նաև երթուղայինի վարորդի հետ։ Վերջինս, վարելով 54 երթուղայինը, ոստիկանների ուղեկցությամբ հեռացավ տարածքից։
ՀՀ քր.օր-ի 104 հոդվածի 1-ին մասի հատկանիշներով հարուցվել է քրեական գործ։
Իրինա Մկրտչյան
