Եթե Քոչարյանը լիներ թուրքական գործակալ, նրա օրոք կգնդակահարեին Վազգեն Սարգսյանին և Կարեն Դեմիրճյանին. Փաշինյան. ՏԵՍԱՆՅՈՒԹ

ՀՀ երկրորդ նախագահ Ռոբերտ Քոչարյանը 2020-ի դեկտեմբերի 4-ին «5-րդ ալիքին» տված հարցազրույցում հայտարարել է, թե այս ամենը ստեղծել է մի իրավիճակ, երբ Ադրբեջանին շանս չի թողել հույս պահելու, որ դիվանագիտական ճանապարհով կարող է որևէ բանի հասնել, իսկ եթե այսպիսի շանս չես թողնում, մնում է պատերազմը: Այս մասին այսօր Ազգային ժողովում հիշեցրեց ՀՀ վարչապետ Նիկոլ Փաշինյանը:

«Հայկական կողմը 20 տարի բանակցությունների շուրջ ունեցել է մեկ խնդիր` անընդհատ հույս ներշնչել Ադրբեջանին, որ բանակցությունների արդյունքում կհասնի այն բանին, ինչ ուզում է, իսկ ինքն ուզում է, որ Ղարաբաղը լինի իր կազմում»,- հայտարարեց վարչապետը:

«Այսինքն` շրջանառության մեջ է դրվել ամենաանհեթեթ թեզը` ամենավատ բանակցություններն ավելի լավ են, քան ամենալավ պատերազմը։

Քոչարյանի ժամանակ Ադրբեջանին ոչ միայն հույս են տվել, այլև երաշխիք, իսկ այդ երաշխիքը ԼՂ-ին բանակցային գործընթացից դուրս թողնելն է»,–ասաց վարչապետը։

Նա մեջբերեց Քոչարյանի հարցազրույցի ևս մեկ հատված, որտեղ Քոչարյանն ասում է` եթե վարչապետը լիներ թուրքական գործակալ, կաներ այն ամենը, ինչ արվել է։ Փաշինյանն ի պատասխան նշեց, որ եթե Քոչարյանը լիներ թուրքական գործակալ, ԼՂ-ն բանակցային գործընթացից դուրս կթողնվեր, և նրա օրոք ՀՀ խորհրդարանում կգնդակահարեին Կարեն Դեմիրճյանին և Վազգեն Սարգսյանին։

«Եթե ԱԱԾ–ն 1990-ին ղեկավարվեր թուրքական գործակալի կողմից, խորհրդարանում կգնդակահարեին արցախյան հաղթանակի հեղինակին ու Հայաստանն արդյունաբերական երկիր դարձրած առաջնորդին։ Դա կարող էր տեղի ունենալ մեկ դեպքում, եթե նրանց անվտանգությունն ապահովված լիներ թուրքական գործակալների կողմից»,-ասաց Փաշինյանը։

Նրա խոսքով` Ռոբերտ Քոչարյան–Սերժ Սարգսյան զույգը դավաճանություն էր համարում ԼՂ հարցը փուլային տարբերակով քննարկելը։ Վարչապետը նշեց, որ այս զույգը 20 տարվա ընթացքում տանուլ է տվել ԼՂ բանակցային գործընթացը, հայ ժողովրդի զրկանքները տանուլ են տվել, «խուրդել» և Բադեն–Բադենում առանձնատներ են կառուցել։

Մանրամասները՝ տեսանյութում: