11.10.2026 | 14:46
Այսօր աղջիկ երեխաների միջազգային օրն է
Բայդենը Պուտինին առաջարկել է հանդիպել երրորդ երկրում
Քաղաքականություն
13.04.2021 | 20:27
ԱՄՆ նախագահ Ջո Բայդենը զանգահարել է Վլադիմիր Պուտինին և առաջարկել հանդիպում անցկացնել, հայտնում է Սպիտակ տունը:
«Նախագահ Բայդենը վերահաստատել է իր նպատակը՝ Ռուսաստանի հետ կայուն և կանխատեսելի հարաբերություններ հաստատել՝ ԱՄՆ շահերին համապատասխան, և առաջարկել է առաջիկա ամիսներին գագաթնաժողով անցկացնել երրորդ երկրում՝ քննարկելու ԱՄՆ-ի և Ռուսաստանի առջև ծառացած հարցերի ամբողջական շրջանակը»,- ասված է Սպիտակ տան տարածած հաղորդագրության մեջ:
Զրույցի ընթացքում երկու ղեկավարները քննարկել են նաև տարածաշրջանային և գլոբալ խնդիրներ՝ ներառյալ ռազմավարական կայունության և զենքի վերահսկման շուրջ երկխոսության շարունակումը՝ հիմք ընդունելով Նոր մեկնարկ պայմանագրի երկարաձգումը:
Բացի այդ, Բայդենը մտահոգություն է հայտնել Ղրիմում և Ուկրաինայի հետ սահմանին ռուս զինվորականների ներկայության մեծացման կապակցությամբ՝ շեշտելով այս երկրի ինքնիշխանությունն ու տարածքային ամբողջականությունը սատարելու Միացյալ Նահանգների «անսասան հանձնառությունը»: ԱՄՆ նախագահը «Ռուսաստանին կոչ է արել լիցքաթափել լարվածությունը»:
Նախագահ Բայդենը նաև ասել է Պուտինին, որ Վաշինգտոնը վճռականորեն կպաշտպանի իր շահերը կիբերհարձակումների և ընտրություններին միջամտելու դեպքում:
