Արցախը կորցնելու հիմնական մեղավորները նախկիններն են. Վահագն Ալեքսանյան. ՏԵՍԱՆՅՈՒԹ

ՀՀ ազգային ժողովի նորընտիր պատգամավոր Վահագն Ալեքսանյանն Արցախի պատերազմում պարտության, տարածքների մի մասի կորստի հիմնական մեղավոր է համարում նախկինում պետությունը թալանածներին, իսկ ներկայիս իշխանությանը մեղավոր է համարում նրանում, որ 2.5 տարում չի կարողացել բեկել ուժերի հարաբերակցությունը՝ հակառակորդի նկատմամբ:  Ալեքսանյանը նման տեսակետ հայտնեց ԱԺ-ում լրագրողների հետ զրույցում՝ անդրադառնալով գործող իշխանությանը դավաճանության մեջ մեղադրողներին:

«Մեղադրողների մեծ մասը տարիներ շարունակ աչքի է ընկել պետության թալանով, բանակի թալանով: Այդ մարդկանց լկտիությունը հասել է այն աստիճանի, որ ծաղրում են ՀՀ վարչապետին՝ զինվորներին թարմ միրգ տալու համար, ասում են՝ ելակով է բանակ պահում: Եփած ցորենով երևի պիտի պահե՞ր»,-ասաց Ալեքսանյանը:

Նա նշեց նաև, թե 2018-ին ԱԺ-ում վարչապետ ընտրվելու ժամանակ Սերժ Սարգսյանը հայտարարել է, թե բանակցային գործընթացը փաստացի գտնվում է փակուղում: «Ի՞նչ պետք է դրանից հետո տեղի ունենար, եթե ոչ պատերազմ, եթե նա փաստացի կտակել էր փակուղում գտնվող գործընթաց»,-ասաց Ալեքսանյանը:

Անդրադառնալով հարցին, թե ի վերջո Արցախի մի մասը կորցնելու, զոհեր ունենալու համար մեղավորը ո՞վ է՝ նա ասաց. «Բնականաբար, հիմնական մեղքի բաժինն այն մարդկանցն է, ովքեր 25 տարի շարունակ առանց խղճի խայթի թալանել են: Ներկայի իշխանությունը մեղավոր է նրանում, որ 2.5 տարում չի կարողացել բեկել ուժերի այն հարաբերակցությունը, որը ձևավորվել էր նախկին ապիկար իշխանությունների շնորհիվ»:

Մանրամասները՝ տեսանյութում: