18.01.2026 | 21:30
Վահագն Խաչատուրյանն այցելել է Ժնևի Սուրբ Հակոբ եկեղեցի
Համարձակություն չունեցան. Զուրաբիշվիլին` տապալված բանակցությունների մասին
Քաղաքականություն
09.04.2021 | 22:49
Ո՛չ իշխանությունը, ո՛չ ընդդիմությունը համարձակություն ու տղամարդկություն չունեցան` զիջումների գնալ ու համաձայնել Եվրամիության առաջարկներին, որոնք կօգնեին հաղթահարել քաղաքական ճգնաժամը։ Նման կարծիք է հայտնել Վրաստանի նախագահ Սալոմե Զուրաբիշվիլին խորհրդարանում տարեկան զեկույցով հանդես գալու ընթացքում, գրում է aliq.ge-ն:
«Կառավարությունը համարձակություն չուներ որոշ «դետալներից» վեր դասել երկրի կայունությունը և ժողովրդավարական առաջընթացը, Եվրոպայի հետ ակտիվ համագործակցությունը: Ընդդիմությունն էլ չհամարձակվեց դրսի շանտաժից ու ճնշումից ազատվել, հարգել իրենց ընտրողներին և ընտրել բազմակուսակցական խորհրդարան վերադառնալու քաղաքական ուղին»,- ասել է Զուրաբիշվիլին:
Նրա կարծիքով՝ հաշվի առնելով անվտանգության բազմաթիվ մարտահրավերները, որոնք առաջ է բերել COVID-19 համաճարակը, քաղաքական պառակտումները, բևեռացումը և «սառեցված» պետությունից դուրս գալու անկարողությունը դառնում են էլ ավելի անհասկանալի:
Նախագահը շնորհակալություն է հայտնել Եվրամիությանը ՝ իշխանությունների և ընդդիմության միջև բանակցային գործընթացում միջնորդի ջանքերի համար` համոզմունք հայտնելով, որ Եվրոպական խորհրդի ղեկավարի հատուկ ներկայացուցչի առաջարկած համաձայնագրի տարբերակը կօգնի կողմերին հասնել «պրագմատիկ և հավասարակշռված փոխզիջման»:
Հիշեցնենք Վրաստանում քաղաքական ճգնաժամն արդեն մի քանի ամսական է: 2020-ի հոկտեմբերի 31-ի խորհրդարանական ընտրություններից հետո խորհրդարանի նիստերին գալիս է 60 ընդդիմադիր պատգամավորից միայն 6-ը: Ընդդիմությունը հրաժարվել է ընդունել ընտրությունների արդյունքները, շարունակում է պահանջել նոր քվեարկություն: Իշխանությունն էլ նրանց մեղադրանքները համարում է անհիմն, ասում, որ նոր ընտրությունների հարցը մեկընդմիշտ փակված է:
