«Կեղծ օղի արտադրողին պետք է լիցենզիայից զրկել». նախկին վարչապետ

Հանրապետականին դուր է գալիս կառավարության այն նախաձեռնությունը, որով պատրաստվում են ապաքրեականացնել տնտեսական մի շարք հանցագործություններ՝ ապրանքանիշի ապօրինի օգտագործումը, կեղծ գովազդը, դրանք փոխարինելով վարչական տույժերով:

Ըստ Գագիկ Մելիքյանի, ապաքրեականացումը կկանխի տնտեսական հանցագործությունը. «Յուրաքանչյուր քաղաքացի, յուրաքանչյուր իրավաբանական անձ վարչական պատասխանատվության ենթարկվելով նախ մնում է իր ընտանիքում, շարունակում է իր տնտեսական գործունեությունը ի շահ մեր երկրի առաջընթացի և զարգացման»:

Պարոն Մելիքյանը չի կարծում, թե օլիգարխները կորցնելու ոչինչ չեն ունենա այս հանցագործությունների ապաքրեականացումից: «Տուգանքի չափը պետք է այնպես որոշվի, որ այն շահը, որը ստացել է կոնկրետ գործողությունը կատարող տնեսվարողը կամ իրավաբանական անձը, կարող է լինել շատ ավելի փոքր, քան դրա դիմաց վճարվող տուգանքի չափը»,-ասում է ՀՀԿ-ական պատգամավորը:

Ապաքրեականացվող հանցագործություններից մեկն էլ կեղծ գինի կամ կեղծ օղի արտադրելն ու իրացնելն է: Հայաստանում, տարբեր տեղեկություններով, այս գործում մասնագիտացած է հանրապետական պատգամավոր Սամվել Ալեքսանյանը:

Խմբակցության քարտուղարն այդպիսի տեղեկություններ չունի, ինքը կեղծված օղի չի տեսել. «Լսել եմ, մամուլից եմ լսել, տարբեր քաղաքացիներից եմ լսել»:

ՀՀԿ-ական պատգամավոր Սամվել Ալեքսանյանը վստահեցնում է, որ ինքն էլ է առաջին անգամ լսում իրեն վերագրվող հանցագործությունների ապաքրեականացման մասին. 

«Ցավդ տանեմ, ես նման բաներով չեմ զբաղվում»:

Ընդդիմադիր պատգամավոր Արամ Սարգսյանը մեկ վայրկյան իսկ չի կասկածում, որ կառավարությունն այս օրինագիծն ընդունում է Սամվել Ալեքսանյանի համար. «Եվ ոչ միայն իր համար»:

Պատգամավորը դեմ է ապաքրեականացմանը, նրան դուր չի գալիս նաև Հանրապետականի պատկերացումը խոշոր տուգանքներով տնտեսական հանցագործություն կատարած օլիգարխներին պատժելու մասին: Ըստ նրա, «եթե մարդը ունի գերհզոր արտադրություն և մարդն օրական արտադրում է 5-ից 10 հատ կեղծված ապրանք, մյուսն արտադրում է 1 միլիոն հատ, եթե էդ տուգանքը երկուսին էլ նույն չափի է, 1 միլիոն արտադրածը նախ չի բռնվի, եթե բռնվի էլ՝ ապա էդ տուգանքն իր համար կլինի առ ոչինչ»:

Պարոն Սարգսյանը նույնպես դեմ է տնտեսական հանցագործին բանտ նստացնելուն, բայց պատիժը պետք է լինի քրեական: Դրանից բացի, պատգամավորն առաջարկում է չբավարարվել նրան տուգանելով: «Առաջին իսկ խախտման դեպքում տուգանքից բացի լիցենզիայից է պետք զրկել, եթե ուզում են մարդը բանտ չնստի, կեղծ օղի արտադրողին պետք է լիցենզիայից զրկել»,- ասում է Արամ Սարգսյանը:

Նախկին վարչապետը կեղծ օղիներ և կեղծված այլ ապրանքներ է տեսել հայկական շուկայում: Կառավարության նոր օրենքը, ըստ նրա, կնպաստի, որ Հայաստանում ավելանա կեղծ ապրանքների արտադրությունը: Միևնույն է, վարչական տուգանքից արտադրողը չի վախենա, եթե լիցենզիայից չզրկվի:

Սպասվելիք օրենսդրական փոփոխություններին Factor.am-ը անդրադարձել էր իր՝ «Ապրանքանիշ կեղծելը կօրինականացվի, իսկ դրանով զբաղվողներն էլ կհամարվեն հմուտ գործարարներ» վերտառությամբ հրապարակման մեջ:

Մհեր Արշակյան