15.12.2024 | 21:00
Այսօր երիտասարդներն ավելի ինքնուրույն են, բայց պակաս տեղեկացված. ապաքաղաքական զրույց Անուշ Ասլիբեկյանի հետ․ ՏԵՍԱՆՅՈՒԹ
Արմեն Սարգսյանի քաղաքացիության «երկար ստվերը»․ ինչի մասին 3 տարի առաջ չի բարձրաձայնել Փաշինյանը․ ՏԵՍԱՆՅՈՒԹ
Քաղաքականություն
06.04.2021 | 21:31
Հայաստանում ընդդիմությունն ու հակաիշխանական հայացքներ ունեցող շրջանակները, ըստ քաղաքական նպատակահարմարության, շահարկում են հանրապետության նախագահ Արմեն Սարգսյանի քաղաքացիության վիճահարույց հարցը: Օրերս էլ Փաստաբանների պալատի նախագահ Արա Զոհրաբյանն ու հինգ տասնյակից ավելի փաստաբաններ Գլխավոր դատախազություն հանցագործության մասին հաղորդում են ներկայացրել՝ պնդելով, որ Արմեն Սարգսյանը 2018 թվականի մարտին ՀՀ նախագահ է ընտրվել՝ թաքցնելով երկքաղաքացիության փաստը: Արա Զոհրաբյանը վստահեցնում է՝ Արմեն Սարգսյանը կարող էր ՀՀ նախագահ ընտրվել միայն այն դեպքում, եթե նրա՝ Մեծ Բրիտանիայի քաղաքացիությունը դադարեցված լիներ մինչև 2012 թվականի մարտի 1-ը, սակայն Փաստաբանների պալատի նախագահին Միացյալ Թագավորությունից հավաստիացրել են, որ նա քաղաքացիությունից հրաժարվել է 2012-ի աշնանը:
Արմեն Սարգսյանի քաղաքացիության խնդրի հետ կապված աղմկոտ քննարկումներն արդիական էին 2018-ին, երբ նա Սերժ Սարգսյանի ղեկավարած ՀՀԿ-ի և նրանց կոալիցիոն գործընկեր ՀՅԴ-ի առաջադրմամբ ընտրվում էր ՀՀ նախագահ: Այժմ տարակուսելի է, որ այս քննարկումներից շուրջ երեք տարի անց փաստաբանները հարցը կրկին օրակարգային են դարձրել:
Փաստաբանների պալատի նախագահի և նրա գործընկերների կողմից հանրապետության նախագահի քաղաքացիության հարցի վիճարկումը համընկնում է այն իրադարձությունների հետ, որ Արմեն Սարգսյանը ԶՈՒ ԳՇ պետ Օնիկ Գասպարյանին աշխատանքից ազատելու՝ Նիկոլ Փաշինյանի որոշումը չվիճարկեց Սահմանադրական դատարանում: Իրավապաշտպան Արթուր Սաքունցն ասում է՝ փաստաբաններն իրենց այս քայլով դիրքավորվում են որպես ընդդիմադիր քաղաքական գործիչներ՝ խախտելով փաստաբանական էթիկան:
Արա Զոհրաբյանը չի հերքում, որ Արմեն Սարգսյանի քաղաքացիության հարցն օրակարգային են դարձրել, քանի որ Օնիկ Գասպարյանին ԳՇ պետի պաշտոնից ազատելու՝ Փաշինյանի միջնորդությունը Սահմանադրական դատարանում նախագահը չի վիճարկել:
Արա Զոհրաբյանն ասում է՝ նախկինում՝ մինչ իշխանափոխությունը, լսել է, որ ընդդիմությունը խնդրահարույց է համարում Արմեն Սարգսյանի քաղաքացիության հարցը, բայց շատ մեծ ուշադրություն չի դարձրել: Փաստաբանների պալատի նախագահը չի կարծում, որ իր և գործընկերների նախաձեռնությունը քաղաքական է:
Անդրադառնալով նախագահի քաղաքացիության խնդրին՝ նշենք, որ Արմեն Սարգսյանը, որը Մեծ Բրիտանիայից Հայաստան էր վերադարձել՝ նախագահ ընտրվելու համար, չնայած բոլոր պահանջներին ու քննադատություններին, այդպես էլ չհրապարակեց համապատասխան փաստաթղթեր, թե երբ է, ի վերջո, հրաժարվել Միացյալ Թագավորության քաղաքացիությունից: Արդեն լրացել է Արմեն Սարգսյանի նախագահության երրորդ տարին, բայց անհայտ է՝ Հայաստանի չորրորդ նախագահն ընտրվելու պահին վերջին 6 տարիներին արդյո՞ք միայն ՀՀ քաղաքացի եղել է:
Արթուր Սաքունցը շարունակում է պնդել՝ Արմեն Սարգսյանը քաղաքացիության հետ կապված խնդիրներ ունի: Իրավապաշտպանն ընդգծում է՝ Արմեն Սարգսյանի կողմից այդ փաստաթղթի հրապարակումը, քաղաքական դաշտից զատ, գտնվում է նաև բարեխղճության տիրույթում:
Արդյո՞ք նախագահն ի վերջո համաձակություն կունենա բացահայտել ճշմարտությունը, թե ոչ՝ հայտնի չէ։ Մինչ այդ, Գլխավոր դատախազությունից հայտնում են՝ փաստաբանների կողմից ներկայացված հանցագործության մասին հաղորդումը փոխանցել են Հատուկ քննչական ծառայություն, որն, ի դեպ, առաջիկայում լուծարվելու է:
Մանրամասները՝ տեսանյութում։
Նարեկ Կիրակոսյան
