Իջեցնելով ԱԺ նախագահի կարգավիճակը, դուք իջեցնում եք ձեր կարգավիճակը. Արա Բաբլոյանը՝ ընդդիմադիր պատգամավորներին

Ազգային ժողովն այսօր առաջին ընթերցմամբ ընդունեց «Անվտանգության խորհրդի կազմավորման և գործունեության մասին» ՀՀ օրենքի նախագիծը: Կողմ քվեարկեց 89 պատգամավոր, դեմ՝ 7, ձեռնպահ՝ 0:

Մինչ քվեարկությունը «Ելք» խմբակցության պատգամավոր Արարատ Միրզոյանը հայտարարեց՝ Հայաստանը գնում է դեպի սուպերվարչապետության՝ Անվտանգության խորհրդի կազմից դուրս թողնելով Ազգային ժողովի նախագահին և ՀՀ նախագահին:

«Սա անթույլատրելի է, մենք դեմ ենք քվեարկելու»,- նշեց ընդդիմադիր պատգամավորը:

Գործընկերոջը շարունակեց «Ելք»-ի մեկ այլ պատգամավոր՝ Արամ Սարգսյանը՝ նկատելով, որ  Հայաստանի նախագահը, ԱԺ նախագահն ու վարչապետը պետության դեմքն են, ապա ասաց՝ նրանք նույն կարգի ճանաչում ունեն, ինչպես դրոշը, զինանշանը. «Պետք  չէ էդ մարդկանց զրկել պատասխանատվությունից, Ազգային անվտանգության խորհուրդը հատուկ իրավիճակների համար է, ֆորսմաժորային իրավիճակների համար: Նախագիծը ներկյացնողներն անգամ չեն պատկերացնում, թե այդ մարմինն ինչի համար է»:

ԱԺ փոխնախագահ, «Ծառուկյան» խմբակցության անդամ Միքայել Մելքումյանն էլ շեշտեց՝ թեև իրենց մտահոգություններն արդեն հայտնել են, սակայն գտնում են՝ երկիրը պետք է ունենա Անվտանգության խորհուրդ, ուստի նախագծին կողմ կքվեարկեն:

«Ելք» խմբակցության պատգամավորների պնդումներին հակադարձեց անձամբ Ազգային ժողովի նախագահ Արա Բաբլոյանը՝ հորդորելով Ազգային ժողովին Սահմանադրությամբ տրված կարգավիճակը չիջեցնել:

«Մենք հանդիսանում ենք բարձրագույն մարմին և ունենք  վերահսկողական իրավիճակ կառավարության գործունեության վրա: Մենք չենք կարող գնալ, մաս կազմել այդ գործունեությանը, որը պետք է մենք վերահսկենք: Իջեցնելով ազգային ժողովի կարգավիճակը՝ դուք իջեցնում եք ձեր կարգավիճակը»:

Մանրամասները՝ տեսանյութում:

Շողիկ Գալստյան