14.05.2026 | 17:00
Խաղաղություն խոսք տվողից մինչև Նախիջևան խոսք տվող՝ ջուր ծեծող են. Գևորգյան․ ՏԵՍԱՆՅՈՒԹ
Եթե բուհերը տեղափոխվեն, 120 հազարանոց քաղաք պետք է կառուցվի․ դա իրատեսական և արդյունավետ չէ․ Գևորգյան․ ՏԵՍԱՆՅՈՒԹ
Հասարակություն
01.04.2021 | 17:53
Ակադեմիական քաղաքը, իմ կարծիքով, դեռևս սովետական ժամանակներից հայտնի «ակադեմգորոդոկ» ռուսական տերմինի անհաջող թարգմանությունն է: Այս մասին լրագրողների հետ զրույցում նշեց ԵՊՀ ռեկտորի պաշտոնակատար Գեղամ Գևորգյանը՝ անդրադառնալով կառավարության ներկայացուցիչների կողմից հնչեցված ակադեմիական քաղաք ստեղծելու գաղափարին:
«Նմանօրինակ ավաններ կամ ուսանողական կոմպուսներ կան բազմաթիվ երկրներում: Առաջին անգամ այդ տերմինը կիրառվել է Նովոսիբիրսկում, որտեղ ստեղծվել էր ակադեմգորոդոկ, որը հիմա էլ գործում է, այնտեղ կենտրոնացված են ինչպես մի շարք բուհեր, այնպես էլ ՌԴ գիտությունների ակադեմիան և Սիբիրյան մասնաճյուղը: Այն խոշոր արդյունաբերական քաղաք է: Այսինքն՝ դա նորություն չէ:
Թամանյանի գծագրած հատակագծում էլ Երևանում առկա է ուսանողական թաղամաս, որտեղ ներկայումս Պոլիտեխնիկական համալսարանն է, Հանրային գրադարանը, Ագրարային համալսարանը, հարակից այգիները, ԵՊՀ 6-րդ մասնաշենքը (Սև շենքը), Բժշկական համալսարանի ամբողջ համալիրը՝ հիվանդանոցով ու անատոմիկով, մինչև Տնտեսագիտության համալսարանի շենքը: Հետագայում այդ տարածքն Օղակաձև այգով ընդարձակվեց մինչև Մանկավարժական համալսարան, իսկ վերևի հատվածում ներառեց նաև Գեղարվեստի ակադեմիան:
Նաև Ավանում ուսանողական թաղամաս կառուցելու գաղափար կար, որտեղ հիմա Ֆուտբոլի ակադեմիան է, մասնավոր տներ և համալսարանականների համար կառուցված շենքն է, իսկ այն ժամանակ ամայի տարածքներ էին:
Այս գաղափարն ինքնին վատը չէ, բայց սխալ ներկայացվեց. պետք է սկսել կառուցելուց, այլ ոչ թե վաճառելուց:
ԵՊՀ շենքը, որն ամենագեղեցիկ շենքերից է, իհարկե, ենթակա չէ վաճառքի, չնայած որ տարածքի հետ կապված բազմաթիվ խնդիրներ ունենք, օրինակ՝ մեքենաների կայանման հարցը:
Այս գաղափարը հին է, ինչպես համալսարանները, սակայն անիրատեսական է, քանի որ մեծ ծախսերի հետ է կապված. «Համալսարանների աշխատողների ու նրանց ընտանիքների, ինչպես նաև ուսանողների համար ակադեմիական թաղամասում պետք է գործեն նաև այլ օբյեկտներ՝ դպրոցներ, սննդի կետեր, մշակութային կենտրոններ, հիվանդանոց և այլն, այսինքն՝ 120.000-130 000-ոց բնակիչ ունեցող քաղաք է պետք ստեղծել, ինչը դժվար է իրականացնել և ռացիոնալ չէ: Խնդիր է նաև, օրինակ, բժիշկներ պատրաստել մի տարածքում, որտեղ չկան հիվանդանոցներ, կամ ինժեներներ պատրաստել, որտեղ չկա արդյունաբերություն»,- նշեց Գևորգյանը:
Մանրամասները՝ տեսանյութում:
