Այս մեխանիզմները թույլ են տալիս միջամտել դատավորի աշխատանքին․ սա անթույլատրելի է․ փորձագետ. ՏԵՍԱՆՅՈՒԹ

ՀՀ կառավարությունը հեղինակել է «Դատական օրենսգրքում փոփոխությունների օրինագիծը», որով Բարձրագույն դատական խորհրդին լիազորություն է տրվում դատավորների վերաբերյալ կարգապահական վարույթներ իրականացնելու։

«Այս բարեփոխումների հեղինակները չեն պատկերացնում, որ դատաիրավական բարեփոխումները դատական օրենսգրքում փոփոխություններով չեն պայմանավորված»,- «ԲԴԽ մենաշնորհային իրավասություննե՞ր. ինչո՞ւ է «Իմ քայլը» գնում այդ քայլին» թեմայով առցանց քննարկման ընթացքում հայտարարեց Թրանսփարենսի Ինթերնեշնլ հակակոռուպցիոն կենտրոնի իրավական հարցերով փորձագետ Հայկ Մարտիրոսյանը:

Հայկ Մարտիրոսյանի համոզմամբ՝ ՀՀ ԱԺ-ն ընդունում է հակասահմանադրական օրենք, ու ամենևին չի նշանակում, որ եթե կոլեգիալ մարմին է, ուրեմն խորհրդարանը նման իրավունք ունի:

«Մենք արդեն երկար ժամանակ չարչարվում ենք այն պարզագույն հանգամանքի վրա, որոնք իրենք շատ են սիրում ասել՝ իրավաբանական ֆակուլտետի երկրորդ կուրսի ուսանողներին էլ է պարզ, որ նման ռեսուրսներ նման պարզագույն խնդիրների վրա ծախսել նպատակահարմար չէ»,- նշեց Մարտիրոսյանը:

Փորձագետի խոսքով՝ փոխանակ նորմերը հստակեցնենք, միջոցներ ծախսենք, մեխանիզմներ մշակենք դատավորների մասնագիտական որակները բարձրացնելու համար, զբաղված ենք այսպիսի փոփոխություններով:

«Դատավորը դատավոր է. ինչի՞ մասին է խոսքը: Սա ակնհայտ տրիվիալ հարց է, որ նման խնդիրներով պետական ապարատը չպետք է զբաղվի: Ուրիշ բանուգործ չկա՞: Դատական համակարգն այնպիսի ավերածության է ենթարկվում, որ ում էլ նշանակեն դատավոր, ուզած-չուզած կախված վիճակում է լինելու: Մեխանիզմներն այնպես են մշակված, որ հաջորդ իշխանությունը կգա, թե մյուսը կգա, որևէ նշանակություն չունի, այս մեխանիզմները թույլ են տալիս ցանկացած պահի միջամտել դատավորի կողմից քննվող գործին, դատական աշխատանքին, ինչը անթույլատրելի է»:

Մանրամասները՝ տեսանյութում: