13.01.2026 | 23:28
ՆԳՆ շրջիկ սպասարկման գրասենյակները ծառայություններ կմատուցեն Գեղարքունիքի և Վայոց ձորի մարզերում
Շոլցը նախկինի պես համաձայն չէ Ուկրաինային TAURUS թևավոր հրթիռներ մատակարարել
Քաղաքականություն
18.11.2024 | 18:41
Գերմանիայի կանցլեր Օլաֆ Շոլցը, չնայած ԱՄՆ-ի որոշմանը՝ թույլ տալ Ուկրաինային ամերիկյան հեռահար հրթիռներ արձակել Ռուսաստանի վրա, այնուամենայնիվ, հրաժարվում է գերմանական TAURUS թևավոր հրթիռները Կիևին փոխանցել, գրում է DW-ի ռուսական ծառայությունը։
«Այո՛, Գերմանիայի կառավարությունը տեղեկացվել է Վաշինգտոնում ընդունված որոշման մասին, և ո՛չ, դա ոչ մի հետևանք չունի Կիևին TAURUS հրթիռներ չմատակարարելու՝ Դաշնային կանցլերի որոշման վրա»,- Բեռլինում հայտարարել է Գերմանիայի կառավարության մամուլի քարտուղարի տեղակալ Վոլֆգանգ Բյուխները։
Ամերիկյան լրատվամիջոցների հաղորդմամբ՝ նախօրեին ԱՄՆ հեռացող նախագահ Ջո Բայդենը, երկար տատանումներից հետո, առաջին անգամ Կիևին թույլ է տվել մի քանի հարյուր կիլոմետր հեռահարությամբ ամերիկյան ATACMS մարտավարական հրթիռները կիրառել Ռուսաստանի թիրախների դեմ։ Այն պետք է օգտագործվի հիմնականում Կուրսկի շրջանում, հնարավոր է՝ հյուսիսկորեական զորքերի կողմից ռուսական հակահարձակումը հետ մղելու համար:
Գերմանիայի ԱԳ նախարար Անալենա Բերբոքն արդեն հավանության է արժանացրել Բայդենի որոշումը։
Իր հերթին, Գերմանիայի Պաշտպանության նախարարության ներկայացուցիչը հայտարարել է, որ Բեռլինի կողմից Ուկրաինային մատակարարվող սպառազինություննը «ուկրաինական զենք է, որը, բնականաբար, կարող է համապատասխանաբար օգտագործվել միջազգային իրավունքի շրջանակում»։
Նա նաև հավելել է, որ Կիևին մատակարարվող գերմանական բոլոր զինատեսակները հեռահար կատեգորիայի մեջ չեն մտնում։
Թարգմանությունը՝ Էմմա Չոբանյանի
