16.02.2026 | 00:04
Հայաստանի գեղասահորդները հաջող մեկնարկեցին Օլիմպիական խաղերում․ ՏԵՍԱՆՅՈՒԹ
Արմեն Դանիելյանը հրաժարվել է ԲԴԽ նախագահի ԺՊ լինել․ Խորհրդի նախագահի պարտականությունները կկատարի Կարեն Թումանյանը
Քաղաքականություն
18.11.2024 | 18:20
Կարեն Անդրեասյանի հրաժարականից հետո ԲԴԽ նախագահի պարտականությունները կկատարի Կարեն Թումանյանը, որը Ազգային ժողովի կողմից ընտրված ԲԴԽ անդամ է։ Այս մասին որոշումը հրապարակվել է Բարձրագույն դատական խորհրդի կայքում։
«Հիմք ընդունելով Բարձրագույն դատական խորհրդի տարիքով ավագ անդամ Արմեն Դանիելյանի կողմից 2024 թվականի նոյեմբերի 18-ին ներկայացված՝ ավագության սկզբունքով Բարձրագույն դատական խորհրդի նախագահի պարտականությունները կատարելուց հրաժարվելու վերաբերյալ դիմումը և ղեկավարվելով «Հայաստանի Հանրապետության դատական օրենսգիրք» սահմանադրական օրենքի 84-րդ հոդվածի 13-րդ մասով, 87-րդ հոդվածի 1-ին մասի 2-րդ կետով և 94-րդ հոդվածի 1-ին մասով` Բարձրագույն դատական խորհուրդը որոշում է Բարձրագույն դատական խորհրդի նախագահի պարտականությունները վերապահել Բարձրագույն դատական խորհրդի հաջորդ տարիքով ավագ անդամ Կարեն Թումանյանին՝ մինչև Բարձրագույն դատական խորհրդի նախագահի թափուր պաշտոնի համալրումը»,- ասված է ԲԴԽ որոշման մեջ, որը ստորագրել է հենց ինքը՝ Կարեն Թումանյանը։
Նշենք, որ Դատական օրենսգրքի համաձայն՝ «Բարձրագույն դատական խորհրդի նախագահի կողմից արձակուրդի կամ գործուղման մեջ գտնվելու դեպքում իրեն փոխարինող չնշանակելու, ժամանակավոր անաշխատունակության, լիազորությունների կասեցման, դադարման կամ դադարեցման դեպքերում Բարձրագույն դատական խորհրդի նախագահի պարտականությունները կատարում է տարիքով ավագ անդամը»: Փաստացի, տվյալ դեպքում տարիքով ավագը եղել է Արմեն Դանիելյանը, որը Դատավորների ընդհանուր ժողովի կողմից ընտրված անդամ էր։ Արմեն Դանեիլյանից հետո տարիքով ավագը Կարեն Թումանյանն է։
Հիշեցնենք, որ երեկվանից իրավապահ համակարգում պաշտոնանկություններ են սկսվել։ Երեկ ուշ երեկոյան պարզվեց, որ պաշտոններից հրաժարավել են ՆԳ նախարար Վահե Ղազարյանը, Քննչական կոմիտեի նախագահ Արգիշտի Քյարամյանը, Հակակոռուպցիոն կոմիտեի նախագահ Սասուն Խաչատրյանը, Տարածքային կառավարման և ենթակառուցվածքների նախարար Գնել Սանոսյանը, ՊԵԿ նախագահ Ռուստամ Բադասյանը։ Այսօր առավոտյան էլ հայտնի դարձավ ԲԴԽ նախագահ Կարեն Անդրեասյանի հրաժարականի մասին։
Այս պաշտոնանկություններին նախորդել էր վարչապետ Նիկոլ Փաշինյանի՝ կառավարության նիստում հնչեցրած դժգոհությունը ինչպես իրավապահ, այնպես էլ՝ դատական համակարգերից։
Հատկանշական է այն հանգամանքը, որ Դատական իշխանությունը իշխանության առանձին ճյուղ է, անկախ օրենսդիր և գործադիր իշխանություններից, սակայն գործադիրի ղեկավարի դժգոհությունը պատճառ է դարձել, որպեսզի դատական իշխանության բարձրագույն մարմնի ղեկավարը՝ ԲԴԽ նախագահը ևս հրաժարական տա։
Արաքս Մամուլյան
