27.11.2024 | 21:28
ՆԳՆ-ԵՄ համագործակցությունը կընդլայնվի․ ՆԳ նախարարն ընդունել է ԵՄ պատվիրակության ղեկավարին
Հյուսիսային Կորեան երկու բալիստիկ հրթիռ է արձակել
Քաղաքականություն
25.03.2021 | 12:48
Հյուսիսային Կորեան այսօր երկու բալիստիկ հրթիռ է արձակել, որոնք ընկել են Ճապոնիայի բացառիկ տնտեսական գոտու սահմաններից դուրս: Այս մասին լրագրողներին ասել է Ճապոնիայի վարչապետ Յոսիհիդե Սուգան, գրում է ՏԱՍՍ-ը:
«Հյուսիսային Կորեան որոշ ժամանակ առաջ երկու բալիստիկ հրթիռ է արձակել: Մենք հաստատում ենք, որ դրանք ընկել են մեր երկրի բացառիկ տնտեսական գոտուց դուրս», – ասել է նա:
Ըստ Սուգայի՝ «հրթիռների արձակումը, որն իրականացվել է վերջին մեկ տարվա ընթացքում առաջին անգամ, սպառնալիք է հանդիսանում տարածաշրջանի և Ճապոնիայի անվտանգության համար, ինչպես նաև խախտում է ՄԱԿ-ի Անվտանգության խորհրդի բանաձևը»:
Ճապոնիայի վարչապետը հանձնարարել է ամեն ջանք գործադրել ԿԺԴՀ կողմից իրականացված փորձարկումների վերաբերյալ տեղեկատվություն հավաքելու, ինչպես նաև նավերի և օդանավերի անվտանգությունը հաստատելու համար:
Ավելի վաղ Ճապոնիայի կառավարությունը հայտնել էր, որ հրթիռի թռիչքային ուղին չի անցել Ճապոնիայի վրայով: Այնուամենայնիվ, առափնյա պահպանությունը հատուկ նախազգուշացում է տվել Ճապոնական ծովում գտնվող ձկնորսական նավերին:
Վերջին անգամ ԿԺԴՀ-ն բալիստիկ հրթիռներ էր արձակել անցյալ տարվա մարտին:
Տաթև Ֆռանգյան
