24.04.2026 | 13:55
Ադրբեջանի ԱԳՆ-ն «դատապարտել» է Երևանում Թուրքիայի դրոշի այրումը
Շիրակում կորոնավիրուսով վարակվածների թիվն աճել է․ բուժհաստատությունները վերսկսել են քովիդով հիվանդների բուժման ստացիոնար ծառայությունը
24.03.2021 | 23:19
Հայաստանում կորոնավիրուսով վարակվածների թվի զգալի աճ է նկատվում։ Վերջին տվյալներով՝ երեկ կատարվել է 5․330 թեստավորում, որից հաստատվել է կորոնավիրուսային հիվանդության 1․164 նոր դեպք, գրանցվել է 14 մահ։
Շիրակի մարզում ևս վարակվածների թվի աճ կա։ Factor.am-ի հետ զրույցում Շիրակի մարզպետարանի առողջապահության ու սոցիալական ապահովության վարչության պետի ժամանակավոր պաշտոնակատար Լեյլի Ասլանյանը տեղեկացրեց, որ վերսկսվել է կորոնավիրուսով հիվանդների ստացիոնար բուժծառայությունը։
Հիշեցնենք, որ հունվարի կեսերից Գյումրու ինֆեկցիոն հիվանդանոցն ու «Գյումրի» բժշկական կենտրոնի քովիդ բաժանմունքը դադարեցրել էին կորոնավիրուսով հիվանդների բուժման ստացիոնար ծառայությունը։
«Երկու ստացիոնարներն էլ արդեն աշխատում են՝ և՛ «Գյումրի» ԲԿ-ի քովիդ բաժանմունքը, և՛ ինֆեկցիոն հիվանդանոցը։ Արդեն մի քանի օր է՝ ստացիոնար ծառայություն ենք իրականացնում, որովհետև թվերը գնալով աճում են»,- ասաց Լեյլի Ասլանյանը։
Նրա խոսքոց՝ բուժհաստություններում բուժում են ստանում ոչ միայն Շիրակի մարզի, այլև Երևանի ու հանրապետության այլ մարզերի բնակիչներ։
«Ստացիոնար բուժում ստացողներն այսօրվա դրությամբ 116-ն են։ Ինֆեկցիոն հիվանդանոցում 59 հիվանդ է բուժվում, «Գյումրի» բուժկենտրոնում՝ 57 հիվանդ։ Տնային պայմաններում էլ բուժվում է 163 հոգի»,- ասաց Շիրակի մարզպետարանի պաշտոնյան՝ հավելելով, որ վարակվածների թիվը ոչ թե կտրուկ, այլ աստիճանաբար աճեց։
Կորոնավիրուսին զուգահեռ՝ ակտիվացել են նաև սուր շնչառական վարակները։
Էմմա Չոբանյան
