Խաչատուրյան քույրերը գործով տուժողներ են ճանաչվել․ ՏԱՍՍ

ՌԴ Քննչական կոմիտեն պաշտոնապես հայտարարել է Միխայիլ Խաչատուրյանի նկատմամբ քրեական գործ հարուցելու մասին՝ նրա սպանության մեջ մեղադրվող երեք դուստրերի նկատմամբ խոշտանգումների և սեռական գործողությունների փաստի առթիվ: Այս մասին հայտնում է ՏԱՍՍ գործակալությունը։

Խաչատուրյան քույրերի փաստաբանները ՏԱՍՍ-ին հայտնել են, որ իրենց պաշտպանները պաշտոնապես ճանաչվել են գործով տուժողներ:

«Նոր ենք ծանոթացել Միխայիլ Խաչատուրյանի դեմ քրեական գործ հարուցելու հետաքննության որոշման հետ: Մեր պաշտպանյալները պաշտոնապես ճանաչվել են տուժողներ»,- ասել է քույրերի փաստաբան Ալեքսեյ Պարշինը:

Նա նշել է, որ բոլոր քույրերն արդեն ծանոթացել են իրենց հոր դեմ քրեական գործ հարուցելու որոշմանը:

Հիշեցնենք՝ ռուսաստանաբնակ Խաչատուրյանների ընտանիքում աղմկահարույց սպանությունը տեղի էր ունեցել անցյալ տարվա հուլիսին: 57-ամյա Միխայիլ Խաչատուրյանի մարմինը հայտնաբերել էին բազմաթիվ կտրած-ծակած վերքերով: Քննության տվյալներով՝ նրան սպանել են երեք դուստրերը:

Աղջիկների պնդմամբ՝ թմրանյութի ազդեցության տակ գտնվող հայրը դանակով հարձակվել է իրենց վրա, իրենք էլ հարկադրված են եղել պաշտպանվել: Քույրերը պնդում են նաև, որ տևական ժամանակ հայրը ծաղրուծանակի է ենթարկել իրենց: Քննչական մարմինները պարզել են, որ աղջիկները չեն ստել հոր վերաբերմունքի առնչությամբ, այդ թվում՝ սեռական բնույթի ոտնձգության: Մարիա, Քրիստինա և Անգելինա Խաչատուրյաններն ամբողջությամբ ընդունել են մեղքը:

Այնուամենայնիվ, քույրերին մեղադրանք էր առաջադրվել նախնական համաձայնությամբ խմբակային սպանության համար: Նրանց 8-20 տարի ժամկետով ազատազրկում է սպառնում: Պաշտպանական կողմն իր հերթին պնդում է, որ տեղի ունեցածն անհրաժեշտ ինքնապաշտպանություն է։

Նելլի Մելքոնյան