Հանրությունը հիասթափված է բոլոր ուժերից, մեր նպատակն է առաջարկներ ներկայացնել նրան. Ալեն Սիմոնյան. ՏԵՍԱՆՅՈՒԹ

«Ընտրական օրենսգրքի վերաբերյալ հիմա քննարկումներ են գնում, կընդգրկվեն նաև խորհրդարանական ընդդիմության մեր գործընկերները, ես չեմ մասնակցել այդ քննարկումներին, մանրամասներ չեմ կարող հայտնել, բայց չեմ բացառում, որ հընթացս մենք քննարկելու ենք նաև նոր Ընտրական օրենսգիրքը»,- լրագրողների հետ զրույցում այս մասին ասաց ԱԺ փոխնախագահ Ալեն Սիմոնյանը:

Հարցին, թե որպես ռեյտինգայինով առաջադրված թեկնածու, կո՞ղմ է, որ ռեյտինգային համակարգը հանվի, Ալեն Սիմոնյանը պատասխանեց, որ իր կարծիքով՝ ռեյտինգային համակարգը ցանկալի է, որ չլինի, բայց ինքը պատրաստ է ՀՀ յուրաքանչյուր ընտրատարածքում որպես ռեյտինգային թեկնածու առաջադրվել:

Ի պատասխան հարցի, որ մեկ ամիս առաջ իշխող ուժը հայտարարում էր արտահերթի պահանջ չկա, հիմա ի՞նչ եղավ, որոշվեց արտահերթ ընտրությունների գնալ, Սիմոնյանն ասաց, որ իշխող ուժը միշտ կողմ է եղել արտահերթ ընտրությունների անցկացմանը, սակայն ընդդիմությունը այլ պահանջներ է ներկայացրել։

«Հաշվի առնելով այն իրավիճակը և քաղաքական առումով լարվածությունը և վերջիվերջո ստեղծված իրավիճակից ամբողջ էներգիան, որ կուտակվել է, պետք է գնա և լցվի քվեատուփերի մեջ:

Իսկ ինչ վերաբերում է հանրության պահանջին, իմ  կարծիքով՝ մեծամասնությունը հիասթափված է քաղաքական բոլոր ուժերից: Եվ քաղաքական ուժերի գլխավոր նպատակն այն է, որ հանրությանը առաջարկներ ներկայացնենք, որը կա՛մ կընդունի, կա՛մ չի ընդունի»,- նշեց Սիմոնյանը:

Հարցին, թե երկրի անվտանգությունից ելնելով, որքանո՞վ էր նպատակահարմար այս պահին ընտրություններ անելը, ԱԺ փոխնախագահը պատասխանեց. «Հենց երկրի անվտանգության նկատառումներից ելնելով է պետք այսօր ընտրություններ անցկացնել, որովհետև երկիրը չի կարող անընդհատ ցնցումների մեջ գտնվել»:

Մանրամասները՝ տեսանյութում: