Կառավարությունն ընդդեմ ՄԻՊ-ի. գնդակը ԱԺ-ի դաշտում է․ ՏԵՍԱՆՅՈՒԹ

Կառավարության և Մարդու իրավունքների պաշտպան Արման Թաթոյանի հարաբերությունները, մեղմ ասած, սրվել են։ Գործադիրը դռնփակ նիստում նախատեսել է կրճատել Մարդու իրավունքների պաշտպանի գրասենյակի բյուջեն։ Վերջին շրջանում Թաթոյանը նաև չի մասնակցում կառավարության նիստերին։

Նա պնդում է, որ իրեն այլևս չեն հրավիրում, վարչապետի խոսնակն էլ հակադարձում է՝ տևական ժամանակ Թաթոյանը չի մասնակցել նիստերին, դրանով պայմանավորված՝ նրան այլևս չեն հրավիրում։

Եվ սա դեռ ամենը չէ։ Թաթոյանը օրերս նշել էր, թե կառավարության՝ ՄԻՊ-ի բյուջեն կրճատելու նախագիծը միտված է ՄԻՊ գործունեության անկախության վերացմանը։

Ֆինանսների նախարարությունը ՄԻՊ-ի բյուջեն կրճատելու մասին ընկալումները որակում է թյուրըմբռնում։ Նրանք պարզաբանում են, թե իրենք ոչ թե ՄԻՊ-ի բյուջեն են կրճատում, այլ փոխում են սահմանադրական դրույթը, համաձայն որի՝ ամեն հաջորդ տարի ՄԻՊ բյուջեն չի կարող պակաս լինել, քան նախորդը։

Իրավապաշտպան Զարուհի Հովհաննիսյանը նշում է՝ ցանկացած իշխանության ժամանակ էլ նորմալ է, որ ՄԻՊ գրասենյակն անհարմարություններ է պատճառում բարձրաստիճան պաշտոնյաներին, բայց դա չի կարող օմբուդսմենին հետապնդելու հիմք դառնալ։

Կառավարությունն այս քայլով սահմանափակում է ոչ թե օմբուդսմենի, այլ անպաշտպան անձանց իրավունքները, նշում է իրավապաշտպան Ժաննա Ալեքսանյանը։

Իրավապաշտպան Նինա Կարապետյանցն էլ ասում է՝ Արցախյան երկրորդ պատերազմի ընթացքում ՄԻՊ գրասենյակն ահռելի աշխատանք է կատարել, միևնույն ժամանակ նշում՝ մինչև պատերազմը եղել են դեպքեր, երբ ՄԻՊ-ը պատշաճ արձագանք կատարված դեպքերին չի տվել։ Բայց, ըստ նրա, կառույցի նկատմամբ կառավարության քայլը ճակատագրական սխալ է։

Իշխող «Իմ քայլը» խմբակցության պատգամավոր Սուրեն Գրիգորյանը, սակայն, պնդում է՝ ՄԻՊ-ի նկատմամբ խտրական վերաբերմունք չկա։ Ասում է՝ խոսքն այն մասին է, որ Կառավարությունը հրաժարվում է տարբեր ոլորտների երաշխավորված բյուջեի գաղափարից։

Հավելենք, որ Կառավարությունը ՄԻՊ-ի բյուջեի վերաբերյալ օրինագիծն ուղարկել է ԱԺ։ Արման Թաթոյանը հայտարարել է, որ եթե Ազգային ժողովն ընդունի այն, ապա ինքը կդիմի Սահմանադրական դատարան։

Մանրամասները՝ տեսանյութում։

Լիլիթ Շաբոյան