15.01.2025 | 23:34
Իսրայելն ու ՀԱՄԱՍ-ը հրադադարի համաձայնագիր են ստորագրել
Տեր-Պետրոսյանն իր իշխանությունը պահելու ճանապարհին ծնեց քոչարյաններ, սարգսյաններ․ Հովիկ Աղազարյան. ՏԵՍԱՆՅՈՒԹ
Քաղաքականություն
17.03.2021 | 18:32
«Մարդ ինչքան լկտի պետք է լինի, որ կեղծած լինելով 95-ի խորհրդարանական և 96-ի նախագահական ընտրությունները…, պատասխանատվության ամենամեծ մասնաբաժինն ունենալով երկրում արձանագրված բացասական իրողությունների առումով, հիմա, երբ նկատվում են քաղաքական կայունությանը միտված դրսևորումներ, ցինիկաբար հանդես գա նման հայտարարությամբ»,- ԱԺ «Իմ քայլը» խմբակցության պատգամավոր Հովիկ Աղազարյանն այսպես է արձագանքել Լևոն Տեր-Պետրոսյանի այն հայտարարությանը, որով նա քաղաքական դաշտում ստեղծված իրավիճակից դուրս գալու ելքերից մեկը համարել է վարչապետ Նիկոլ Փաշինյանի հրաժարականը և արտերկրում ապաստան խնդրելը, իսկ երկրի ժամանակավոր ղեկավարի պաշտոնում անկուսակցական փոխվարչապետի նշանակումը:
Factor.am-ի հետ թեմայի շուրջ զրույցում Աղազարյանը նշեց, որ Տեր-Պետրոսյանի վարած քաղաքականության հետևանքով երկրում առաջացել էին սոցիալական խնդիրներ, տնտեսությունն ավերվել էր, 4,5 միլիոն բնակչություն ունեցող երկիրը դարձլ էր 2,5 միլիոնանոց:
«Կեղծվել էին 95թ. և 96թ. ընտրությունները, և դրա արդյունքում որոշ ուժերի պահանջով նա լքեց, փախավ պատասխանատվությունից, որովհետև ժողովրդի մեջ հենարան չուներ: Այսօր ժողովրդի մեջ անվերապահ հենարան ունեցող քաղաքական ուժի լիդերին ասում է հրաժարական տա և ապաստան խնդրի դրսո՞ւմ: Այն դեպքում, երբ որ խորհրդարանական ընդդիմության և իշխող քաղաքական ուժի, ինչպես նաև արտախորհրդարանական ուժերի հետ քննարկումների արդյունքում նշույլներ են երևում, որ հնարավոր է գալ կոնսենսուսի և միասնական դուրս գալ այս իրավիճակից, և այդպիսի հեղինակավոր մարդն այդպիսի հայտարարությո՞ւն է անում… Մենք մեզ վստահողներին թողնենք «անտեր» ու փախչե՞նք…»,- նշեց պատգամավորը:
«Հոկտեմբերի 27-ն էլ հետևանքն էր Տեր-Պետրոսյանի ցանած սերմերի: Իր կողմից վարվող քաղաքականության և իշխանությունը ամեն գնով պահելու ճանապարհին նա ծնեց քոչարյաններ, սարգսյաններ և էլի ուրիշ բացասական երևույթներ»,- ընդգծեց Աղազարյանը:
Մանրամասները՝ տեսանյութում:
