Արտահերթ ընտրություն կլինի՞․ Փաշինյան-Ծառուկյան հանդիպումը վճռորոշ է լինելու․ ՏԵՍԱՆՅՈՒԹ

Հայաստանում ներքաղաքական ճգնաժամի խորացման ֆոնին քաղաքական ուժերն արտահերթ ընտրությունների գնալու հարցում ընդհանուր հայտարարի չեն գալիս: Իշխանական և ընդդիմադիր ճամբարներից շարունակում են միմյանց մեղադրել ու պայմաններ թելադրեն: Իշխող «Իմ քայլից» ԱԺ փոխնախագահ Ալեն Սիմոնյանը, օրինակ, այսօր հայտարարեց, որ «Լուսավոր Հայաստան»-ը կողմ չէ արտահերթ ընտրություններին։ Փաշինյանի թիմակիցը պնդում է՝ ԼՀԿ-ն գտնելու է բազմաթիվ պատճառներ՝ արտահերթ ընտրություններից խուսափելու համար։

Բացելով փակագծերը՝ Սիմոնյանն ասաց՝ այդպես է կարծում, որովհետև լավ է ճանաչում Էդմոն Մարուքյանի գործելաոճը․ ներկայացնում է մի տարբերակ, հետո փորձում պայմանների և պատճառների բերումով այդ պայմանավորվածությունից հետ կանգնել: Ալեն Սիմոնյանն ակնարկում է՝ եթե լինեն ընտրություններ, ապա Մարուքյանի գլխավորած ուժը կա՛մ չի հաղթահարի անցողիկ շեմը, կա՛մ ավելի քիչ թվով պատգամավորներով ներկայացված կլինի խորհրդարնում:

«Լուսավոր Հայաստան»-ի օրակարգը չի փոխվել՝ ցանկացած պայմանով մինչև հունիսի 1-ը պատրաստ են գնալ արտահերթ ընտրությունների, Ալեն Սիմոնյանի մեղադրանքներին ի պատասխան՝ հայտարարեց Էդմոն Մարուքյանը և պնդեց, որ ԼՀԿ-ն է Հայաստանում ձևավորել արտահերթ ընտրությունների օրակարգը:

Մարուքյանն էլ իր հերթին է իշխանություններին մեղադրում ընտրություններն արհեստական հետաձգելու համար։ Նշում է՝ իշխանության ներկայացուցիչները զանգերով, հանդիպումներում և անգամ Ֆեյսբուքում պայման են առաջ քաշում՝ Ընտրական օրենսգրքին կողմ քվեարկեք, որ ընտրությունների գնանք: «Լուսավոր Հայաստանի» ղեկավարը հակված է կարծել, որ իշխանությունները, տեսնելով ընդդիմության պատրաստակամությունը, արհեստական ձախողում են խորհրդարանի լուծարման գործընթացը:

Արտահերթ ընտրությունների անցկացման ժամկետների հետ կապված հստակություն չկա, քննարկումներ են տեղի ունենում, հայտարարում է Ալեն Սիմոնյանը՝ չթաքցնելով, որ ՔՊ-ի օրակարգում ընտրություններից առաջ նաև ԸՕ-ի փոփոխությունն է:

Էդմոն Մարուքյանը հայտարարում է՝ մինչև հունիսի 1-ը պատրաստ են ցանկացած ԸՕ-ով ընտրությունների գնալ: Գագիկ Ծառուկյանի ղեկավարած ուժից ԱԺ փոխնախագահ Վահե Էնֆիաջյանն էլ նշում է, որ ԲՀԿ-ի համար ընդունելի է համապետական ցուցակներով ընտրության գնալը:

Արտահերթ ընտրությունների անցկացման ժամկետների հստակեցման համար վճռորոշ է լինելու Գագիկ Ծառուկյան-Նիկոլ Փաշինյան հանդիպումը: Վահե Էնֆիաջյանից հետաքրքրվեցինք՝ ինչո՞ւ են հապաղում Ծառուկյանն ու Փաշինյանը:

Փաշինյան-Ծառուկյան հանդիպման մասին պաշտոնապես որևէ տեղեկություն չկա: Մեզ հասած տեղեկություններով՝ հնարավոր է, որ այդ հանդիպումը տեղի ունենա վաղը: Փաշինյանի աշխատակազմից նշում են՝ երբ հստակություն լինի, կհայտարարեն:

Մանրամասները՝ տեսանյութում։

Նարեկ Կիրակոսյան