Հայաստանի դեմ պատերազմելու նախապատրաստությո՞ւն, թե՞ ներքին խնդիրների դեմ կատարված քայլ. քաղաքագետերը՝ Ադրբեջանում արտահերթ նախագահական ընտրությունների մասին

Ադրբեջանի նախագահ Իլհամ Ալիևը հրամանագիր է ստորագրել երկրում արտահերթ նախագահական ընտրություններ անցկացնելու վերաբերյալ: Ընտրությունները պետք է անցկացվեին այս տարվա հոկտեմբեր ամսին, սակայն դրանք կկայանան ապրիլին: Պաշտոնական մեկնաբանություն, թե ինչու է որոշվել ժամանակից առաջ ընկնել, չկա:

Factor.am-ի հետ զրույցում քաղաքագետ Լևոն Շիրինյանը չբացառեց, որ այս քայլով Ալիևը փորձել է հանկարծակիի բերել իր մրցակիցներին. «Շտապում են, որպես աննորմալ իշխանություններ: Հակառակորդին, ներքին մրցակիցներին հանկարածակիի բերելու տակտիկական քայլ է: Նպատակն այն է, որ Ալիևը փառավոր հաղթանակ տանի ու ցայտնոտային իրավիճակ ստեղծվի մրցակիցների մոտ»:

Քաղաքագետի խոսքով, եթե ընտրություններն իրենց ժամանակին տեղի ունենային, ապա Ալիևը մրցակիցներին նախապատրաստվելու ժամանակ կտար, իսկ այս կերպով նրանց ուղղակի հանկարծակիի են բերել՝ «մինչև նրանք գլխի ընկնեն, Ալիևը կանցնի»:

Մինչդեռ քաղաքագետ Հրանտ Մելիք-Շահնազարյանը նշում է, որ հնարավոր է՝ Ալիևը ներքին պայմանավորվածություններ է ձեռք բերել, որոնց հիման վրա էլ ընտրությունները կանցկացվեն ապրիլին. «Ակնհայտ էր, որ ներքաղաքական բոլոր պայմանավորվածություններն Ադրբեջանի նախագահ Ալիևն արդեն ձեռք է բերել և ըստ էության կարելի է ենթադրել, որ նրան հաջողվել է որոշակի համաձայնություն կամ համերաշխություն ձեռք բերել»:

Ըստ քաղաքագետի, արտահերթ ընտրություններով Ալիևը երկու խնդիր կարող է լուծել . «Առաջինը այն է, որ ներպետական բարդ տարի է, և Ալիևը փորձում է ընտրական հարցերը արանքից շուտ հանել: Երկրորդը՝ կարող է լուրջ գործողություններ անկացնելու նախապատրաստության համար է արվում: Հիմա Ալիևը փորձում է ձեռքերն ազատել ներքին կապանքներից և հնարավոր է արտաքին քաղաքական ոլորտում ավելի ակտիվանա: Հարկավոր է ուշադիր հետևել Ադրբեջանում ընթացող զարգացումներին՝ խուսափելու համար ևս մեկ անցանկալի զարգացումից»:

Հայաստանի համար անցկանկալի զարգացումների մտավախություն ունի նաև քաղաքագետ Արմեն Գրիգորյանը: Նա Ալիևի՝ արտահերթ ընտրություններ անցկացնելու որոշումը երկու հնարավոր պատճառներով է մեկնաբանում. «Ալիևը չի ցանկանում սպասել մինչև հոկտեմբեր, որպեսզի ներքին խնդիրները կարողանա փակել: Մյուս հավանական տարբերակն այն է, որ Ադրբեջանը ցանկանում է պատերազմել: Նա հիմա չի կարող պատերազմ սկսել, քանի որ եթե պարտվի, հետագայում ընտրությունները դժվար կլինեն: Բացի այդ, եթե սպասեր ընտրություններին ու հետո պատերազմեր, արդեն ձմռան ամսիներ կլինեին և դժվար կլիներ իրենց համար: Իսկ ապրիլի ընտրություններից հետո իրենց համար ավելի հարմար ժամանակաշրջան է գալիս: Ադբրբեջանը միշտ էլ ցույց է տվել, որ հարցը ցանկանում է ռազմական ճանապարհով լուծել»,- եզրափակեց քաղաքագետը:

Լիլիթ Շաբոյան