Իսպանիան կփորձարկի 4-օրյա աշխատանքային շաբաթվա ռեժիմը․ The Guardian

Իսպանիան կարող է դառնալ աշխարհում առաջին երկրներից մեկը, որը կփորձի անցում կատարել քառօրյա աշխատանքային շաբաթվա ռեժիմին։ Այս մասին տեղեկանում ենք The Guardian պարբերականից։

Նշվում է, որ Իսպանիայի կառավարությունը համաձայնել է փորձնական նախագիծ սկսել այն ընկերությունների համար, որոնք հետաքրքրված են այդ գաղափարով:

Այս տարվա սկզբին իսպանական ձախ կուսակցությունններից մեկը հայտարարել էր, որ կառավարությունն ընդունել է 4-օրյա աշխատանքային ռեժիմը փորձարկելու իր առաջարկը: Դրանից հետո բանակցություններ են անցկացվել։ Հաջորդ հանդիպումը տեղի կունենա առաջիկա շաբաթների ընթացքում:

The Guardian-ը նշում է, որ քառօրյա աշխատանքային շաբաթվա գաղափարը կայուն կերպով տարածում է գտնում ամբողջ աշխարհում՝ Նոր Զելանդիայից մինչև Գերմանիա։ Դրա ջատագովները նշում են, որ քառօրյա աշխատանքային շաբաթվա շնորհիվ կավելանա աշխատակիցների աշխատանքի արդյունավետությունը, կբարելավվի նրանց հոգեկան առողջությունը, ինչպես նաև դրա շնորհիվ հնարավոր կլինի պայքարել կլիմայական փոփոխությունների դեմ։

Քառօրյա աշխատանքային ռեժիմի գաղափարն առաջարկած կուսակցությունը նաև առաջարկել է ծրագրին մասնակցող ընկերությունների համար ռիսկերի նվազեցում կատարել, այն է՝ առաջին տարում պետությունը կծածկի ընկերության կրած կորուստներն ամբողջությամբ, երկրորդ տարում՝ 50%-ով, իսկ երրորդ տարում՝ 33%-ով։

Իսպանական կուսակցությունից հայտնել են, որ, իրենց հաշվարներով, նախաձեռնությանը շուրջ 200 ընկերություն կարող է մասնակցել․ ընդհանուր առմամբ՝ 3000-ից 6000 աշխատող։

Նելլի Մելքոնյան