Ադրբեջանը մեծ թվով իսրայելական զինատեսակներ է օգտագործելու զորավարժությունների ընթացքում

Ադրբեջանում այսօր մեկնարկել են Արցախյան երկրորդ պատերազմից հետո առաջին լայնածավալ օպերատիվ-մարտավարական զորավարժությունները՝ տարբեր տեսակի զորքերի ներգրավմամբ։ Զորավարժություններին, որոնք անցկացվում են պաշտպանության նախարարի ղեկավարությամբ, մասնակցում են մինչև 10․000 զինծառայողներ, 100 միավոր տանկ ու այլ զրահամեքենա, մինչև 200 տարբեր տրամաչափի հրթիռահրետանային կայանքներ, ականանետեր, մինչև 30 միավոր ռազմական ավիացիա։

«Israel Hayom» պարբերականը գրում է, որ զորավարժություններին կիրառվելու են իսրայելական զինատեսակներ։ Լրատվամիջոցին Ադրբեջանի Պաշտպանության նախարարության բարձրաստիճան պաշտոնյաներից մեկը հայտնել է, որ օգտագործվելու են Plasan Sand Cat, հակատանկային Tamuz մոդելի Spike հրթիռներ, Lahat հրթիռներ, 120 մմ Elbits ականանետային SPEAR համակարգ։

Ադրբեջանցի պաշտոնյան նաև հավելել է, որ կօգտագործվեն իսրայելական անօդաչու սարքեր, այդ թվում՝ գերժամանակակից IAI Heron, IAI Harop, Hermes տեսակի անօդաչուներ։

Իսրայելա-ադրբեջանական հարաբերությունների փորձագետ, Իսրայելում Ադրբեջանի տան տնօրեն Արյե Գուտն էլ լրատվամիջոցին ասել է, որ «Իսրայելն ուրախ է Հարավային Կովկասում իր կարևոր աշխարհաքաղաքական ու ռազմավարական գործընկերոջ հաղթանակի կապակցությամբ», և հիմա էլ փաստ է, որ իսրայելական անվտանգային ոլորտի ընկերությունները համագործակցում և շարունակում են համագործակցել Ադրբեջանի ռազմական համակարգի կառուցման գործում։

Նշենք, որ ադրբեջանական զորավարժությունները կտևեն մինչև մարտի 18-ը։

Էմմա Չոբանյան