Ռազմական դրությունը հանելու առաջարկը մերժվեց, «Իմ քայլի» պատգամավորները ժամկետներ ասացին. Լուրեր

Պաշտպանության նախարարի տեղակալ Արման Սարգսյանը այսօր անդրադարձել է Կապանի դիրքի տարածված տեսանյութին ու ասել է, որ դիրք թողնելու հրաման չկա։ Գլխավոր շտաբում իրավիճակին անդրադառնալիս Սարգսյանը հիշեցրել է, որ շտաբի պետի պարտականությունները կատարում է նրա տեղակալը։ Սարգսյանը չի պատասխանել Factor.am-ի հարցին՝ արդյո՞ք հակասություն չկա այն բանում, որ ՇՊ տեղակալը նույնպես պահանջել է Փաշինյանի հրաժարականը։

—
ՀՀ ԱԺ պաշտպանության և անվտանգության հանձնաժողովում բացասական եզրակացություն է ստացել ընդդիմադիր խմբակցությունների առաջարկը՝ վերացնել Հայաստանում սեպտեմբերի 27-ից սահմանված ռազմական դրությունը։ Իշխանական խմբակցության պատգամավորները դեմ են քվեարկել առաջարկին։

Իշխանական խմբակցության ներկայացուցիչները պնդել են, որ արտահերթ խորհրդարանական ընտրությունների դեպքում ռազմական դրությունը պետք է հանվի, հետևաբար կարող են սպասել 7-10 օր, և իշխանությունը ինքը կառաջարկի անել դա։

Հանձնաժողովը դրական եզրակացություն է տվել նախագծին, որով առաջարկվում է պայմանագրային ծառայության առավելագույն տարիքը 42 տարեկանից հասցնել մինչև 63 տարեկանի։ Նախագիծը կուղարկվի ԱԺ՝ լիագումար քննարկման։

—
Արցախի պաշտպանության բանակը հրապարակել է ևս 96 զոհված զինծառայողների, պահեստազորայինների և կամավորականների անուններ։

Արցախի վերահսկողությունից դուրս գտնվող տարածքներում զոհված զինծառայողների աճյունների որոնողական աշխատանքներն այսօր ևս դադարեցվել են եղանակային անբարենպաստ պայմանների պատճառով: Եթե ձյան տեղումներ չլինեն ու բավարար տեսանելիություն լինի՝ աշխատանքները կվերսկսվեն վաղը:

—