Արման Աբովյանը՝ ԲՀԿ-ի՝ ժամանակավոր կառավարության գաղափարից հրաժարվելու մասին. ՏԵՍԱՆՅՈՒԹ

«Իշխանությունը ոչ ադեկվատ գնահատական է տալիս իրավիճակին»,- այս մասին ԱԺ-ում լրագրողների հետ զրույցում նշեց ԱԺ ԲՀԿ խմբակցության քարտուղար Արման Աբովյանը:

«Ռազմական դրությունը հանելու առաջարկությամբ առաջին հերթին ցանկանում էինք թոթափել երկրում առկա լարվածությունը, բայց իշխանությունները կրկին այդ լարվածությունը պահպանեցին՝ մերժելով առաջարկը: Եթե այսպես շարունակեն լարվածությունը գնալով ավելանալու է»,- նշեց Աբովյանը:

Նա համաձայնեց, որ ռազմական դրությունը հանելուց հետո ընդդիմադիր երկու խմբակցության ձայները բավարար չեն վարչապետին անվստհություն հայտնելու համար. «Ռազմական դրությունը նաև այլ սահմանափակումներ է ենթադրում, օրինակ ընտրությունների անցկացումը: Բացի դրանից, կան քաղաքական մեխանիզմներ, որոնք այս կամ այն կերպ իրենք տեսնում են որպես վտանգ:Ես կդժվարանամ, ասել, թե կոնկրետ ինչից են վախենում, բայց որ վախենում են, դա ակնհայտ է»:

Աբովյանը նաև նշեց, որ Գագիկ Ծառուկայնը ասել է՝ վարչապետի հրաժարական, ապա որքան հնարավոր է շուտ արտահերթ ընտրություններ. «Ոչ մի պարագայում, փողոցային պայքարը չի դադարելու, քանի դեռ այս իշխանությունները չեն հեռացել»։

Անդրադառնալով դիտարկմանը, որ ԲՀԿ-ն կարծեք թե մտափոխվել է, հրաժարվել է ժամանակավոր կառավարության գաղափարից և համաձայն է Նիկոլ Փաշինյանի վարչապետության պարագայում արտահերթ ընտրություններին, Աբովյանը նշեց. «Հայրենիքի փրկության շարժումը հավաքվել է մի գաղափարի շուրջ՝ Նիկոլ Փաշինյանի հեռացում, դրանից հետո պետք է լինեն ընտրություններ… Նիկոլ Փաշինյանը պետք է տա հրաժարական, և լինեն արտահերթ ընտրություններ: Մնացածը հնթացս պարզ կլինի»:

Մանրամասները՝ տեսանյութում: