19.05.2026 | 23:24
Արփինե Սարգսյանը և ԱՄՆ ժամանակավոր հավատարմատարը քննարկել են կիբեռլաբորատորիայի ստեղծումն ու համագործակցության ընդլայնումը
ՀՀ պաշտպանության նախարարն այցելել է Պաշտպանական ազգային հետազոտական համալսարան
Հասարակություն
12.03.2021 | 19:25
Մարտի 12-ին ՀՀ պաշտպանության նախարար Վաղարշակ Հարությունյանն այցելել է ՊՆ պաշտպանական ազգային հետազոտական համալսարան:
Համալսարանի պետ, գեներալ-մայոր Գենադի Տավարածյանը պաշտպանական գերատեսչության ղեկավարին է ներկայացրել ՊԱՀՀ-ի գործառույթները, ուսումնական և հեռանկարային ծրագրերը:
ՀՀ պաշտպանության նախարարը զրուցել է համալսարանում վերապատրաստվող սպաների հետ, մասնագիտական գիտելիքներից զատ՝ կարևորել տարածաշրջանային անվտանգային հարցերին քաջատեղյակ, վերլուծական ունակություններով օժտված սպայակազմի դերակատարումը անվտանգային բնույթի ճգնաժամերի լուծմանն ուղղված որոշումների կայացման գործում:
Այցելության ընթացքում Վաղարշակ Հարությունյանը եղել է նաև ՊԱՀՀ-ի տարածքում գործող Մարտական գործողությունների ընթացքում գերության մեջ հայտնված կամ գտնվելու վայրն անհայտ զինծառայողների և այլ անձանց տվյալների ճշտման և հավաքագրման հանձնաժողովի աշխատավայրում, ծանոթացել ընթացիկ աշխատանքներին:
Հանձնաժողովի նախագահ, գեներալ-մայոր Արթուր Սիմոնյանը պաշտպանության նախարարին է ներկայացրել մինչ օրս իրականացված աշխատանքերն ու ընթացիկ գործունեությունը: Վաղարշակ Հարությունյանը ևս մեկ անգամ ընդգծել է հանձնաժողովի կողմից իրականացվող՝ անհայտ կորած համարվող զինծառայողների ու քաղաքացիական անձանց վերաբերյալ տվյալների հստակեցմանն ու գերության մեջ հատնվածների վերադարձի ուղղությամբ իրականացվող աշխատանքների կարևորությունը:
ՀՀ պաշտպանության նախարարը զրուցել է նաև հանձնաժողովի կազմում գործող «թեժ գծի» աշխատակիցների հետ, շնորհակալություն հայտնել կատարած աշխատանքի համար, հետաքրքրվել դիմումատուների կողմից առավել հաճախ բարձրաձայնվող հարցերով և խնդիրներով:
