Երկխոսությունը կստացվի՞․ «Իմ քայլն» ու ԼՀԿ-ն ընդունել են նախագահի առաջարկը, ՀՓՇ-ն պայման է դրել․ ՏԵՍԱՆՅՈՒԹ

Նախագահ Արմեն Սարգսյանը երեկ հայտարարեց, որ երկրում շարունակվում է քաղաքական ճգնաժամը, և այն հաղթահարելու համար հանդիպման է հրավիրում իշխանության ու ընդդիմության ներկայացուցիչներին։

Նախագահականի տարածած հաղորդագրությունում նշվում է. «Իրավիճակը մնում է լարված, ինչը կարող է անկանխատեսելի և անդառնալի հետևանքներ ունենալ մեր պետության և պետականության համար: Խնդիրները շատ են, դրանց լուծումը պահանջում է նաև հրատապ և համակարգային փոփոխություններ, այդ թվում՝ սահմանադրական և օրենսդրական: Թե՛ իշխանությունը, թե՛ խորհրդարանական և արտախորհրդարանական քաղաքական ուժերը բազմիցս արտահայտել են իրենց դիրքորոշումները: Սակայն, բացակայում են փոխըմբռնումը և միմյանց ընդառաջ գնալու ցանկությունը: Առաջնորդվելով համապետական ու համազգային շահերով՝ առկա իրավիճակը քննարկելու և ճգնաժամը հաղթահարելուն ուղղված փոխընդունելի լուծումներ գտնելու նպատակով Հանրապետության վարչապետին, խորհրդարանական խմբակցությունների ղեկավարներին և «Հայրենիքի փրկության շարժման» ղեկավարներին ս/թ մարտի 13-ին ժամը 12:00-ին հրավիրում եմ հանդիպման նախագահական նստավայրում»:

Վարչապետի աշխատակազմից դեռևս չեն շտապում հայտնել՝ կմասնակցի Փաշինյանը հանդիպմանը, թե ոչ: Հայտնի է, որ «Իմ քայլը» ընդունել է հրավերը: Իշխանական պատգամավոր Նիկոլայ Բաղդասարյանը լրագրողներին այսօր ասաց՝ կողմ է քննարկումներին, սակայն հավելեց՝ նախագահին որպես անկախ արբիտր չի դիտարկում։

«Լուսավոր Հայաստան» կուսակցությունը ևս հայտարարություն է տարածել նշելով, որ իրենց խմբակցության ղեկավարը կմասնակցի նախագահի կազմակերպած հանդիպմանը։

«Հայրենիքի փրկության շարժման» անդամները նախապայման են առաջ քաշել․ կհանդիպեն նախագահին, եթե հանդիպումը կայանա ԱԺ-ում և ուղիղ հեռարձակվի:

Արտախորհրդարանական «Քաղաքացու որոշում» կուսակցությունը ողջամիտ է համարում նախագահի առաջարկը և փողոցային ակցիաներ իրականացնող ուժերին կոչ անում երկխոսության սեղանի շուրջ նստել։

Գերագույն խորհրդի նախկին պատգամավոր Վիգեն Խաչատրյանը ևս կարծում է, որ ճգնաժամի լիցքաթափման լավագույն միջոցը երկխոսությունն է․ կողմերը պետք է խոսեն ու համաձայնության գան։ Խաչատրյանի կարծիքով՝ հիմա կողմերի միջև լուրջ կոնֆլիկտ չկա, քանի որ, ըստ նրա, 16+ ուժերը չունեն հասարակության լայն շրջանակների աջակցությունը ու չեն էլ ունենալու։

Նշենք, որ իշխանությանն ու ընդդիմությանը փոխզիջումների գնալու և ճգնաժամը առանց ցնցումների հաղթահարելու կոչ է արել նաև առաջին նախագահ Լևոն Տեր-Պետրոսյանը։

Մանրամասները՝ տեսանյութում։

Լիլիթ Շաբոյան