26.11.2024 | 20:14
Հայաստանի մի շարք շրջաններում ձյուն է տեղում
Եթե 18-մետրանոց ավտոբուսների շահագործումն ինչ-որ երթուղում խնդիր առաջացնի, ապա այն կփոխարինվի 12-մետրանոցներով. ի՞նչ փոփոխություններ են սպասվում
Տնտեսություն
02.02.2018 | 14:56
Միջազգային փորձից ելնելով՝ առաջարկվել է 18-մետրանոց ավտոբուսները շահագործել 11 երթուղում: Այս մասին այսօր լրագրողների հետ հանդիպմանը, պատասխանելով Factor.am-ի հարցին՝ ասաց Երևանի քաղաքի հասարակական տրանսպորտի բարեփոխումների աշխատանքային խմբի ղեկավար, քաղաքապետի տեղակալ Վահե Նիկոյանը՝ ընդգծելով, որ մեծ տեղատարողությամբ ավտոբուսների շահագործումը ենթադրում է ծախսերի նվազեցում:
«Եթե հնարավոր է մեծ տեղատարողությամբ ավտոբուսների շահագործումը, ապա ինչո՞ւ չշահագործել, եթե դա ուղղակի ենթադրում է ծախսերի նվազեցում: Մենք այս փուլում պետք է իրականացնենք փորձարկում և հետազոտություն՝ որքանո՞վ է իրատեսական այն երթուղիներում և փողոցներում, որտեղ առաջարկվել են 18-մետրանոց ավտոբուսներ, շահագործել: Եթե հնարավոր է, ապա ես վստահ եմ, որ դրա արդյունավետությունն առաջին հերթին կանդրադառնա հետագա սակագնի վրա»,- նշեց փոխքաղաքապետը:
Ըստ նրա՝ 18-մետրանոց ավտոբուսների հիմնական մասը շրջանցելու է Երևանի կենտրոնը, ցանցի առավելություններից մեկն էլ այն է, որ կենտրոնի շատ փողոցներ բեռնաթափվելու են:
«Հիմնականում բոլոր գլխավոր փողոցներում տեղատարողության մեծացման հաշվին նախատեսվում է մեկ երթուղի կամ մեկ տրանսպորտային միջոց, և եթե ցանկացած տարբերակով մենք համեմատենք առկա իրավիճակի հետ, երբ կանգառում կանգնում են միանգամից 4-5 տրանսպորտային միջոց, մենք այդ խնդիրները չենք ունենա»,- շարունակեց Վահե Նիկոյանը՝ ընդգծելով, որ եթե, այնուամենայնիվ, 18-մետրանոց ավտոբուսների շահագործումն ինչ-որ երթուղում խնդիր առաջացնի, ապա այն կփոխաինեն 12-մետրանոց ավտոբուսներով:
Տրանսպորտի բարեփոխումների աշխատանքային խմբի ղեկավարը վստահեցրեց՝ նոր ցանցով ուղևորափոխադրումները կիրականացվեն ավելի արագ, քան գործող ցանցով: Մարդիկ կկարողանան լիարժեք պլանավորել իրենց ուղևորությունը:
«Նոր ցանցով հասարակական տրանսպորտի սպասարկման մեկնարկը նախատեսվում է իրականացնել ժամը 06:45-ին և ավարտել 24:00-ին: Ապահովվելու է 1 ժամ 15 րոպե ավելի սպասարկում, քան գործող ցանցով է իրականացվում: Առավոտյան 8-ից մինչև երեկոյան 7-ը ինտենսիվ սպասարկում է իրականացվելու՝ 5 րոպե հաճախականությամբ»,- մանրամասնեց Նիկոյանը: Ինչ վերաբերում է ուղեվարձի բարձրացմանը, ապա այսօր փոխքաղաքապետն այդպես էլ չհստակեցրեց՝ որքանով կբարձրանա ուղեվարձը: Միայն պնդեց՝ ամեն ինչ անելու են, որ ուղեվարձը լինի մատչելի:
Շողիկ Գալստյան
