Նաիրի Հունանյանի քաղաքական հայրիկ Վազգեն Մանուկյանը պետք է մեկուսացվի․ տեռորի կոչեր անելու հնարավորությունից պետք է զրկվի․ Ռուբեն Մեհրաբյան․ ՏԵՍԱՆՅՈՒԹ

Factor TV-ի հարցազրույցը «Հանուն Հանրապետության» կուսակցության ղեկավար մարմնի անդամ, քաղաքական մեկնաբան Ռուբեն Մեհրաբյանի հետ

-Վարչապետ Նիկոլ Փաշինյանը ԶՈՒ Գլխավոր շտաբ է այցելել՝ հանդիպելով իր հրաժարականը պահանջող գեներալներին։ Արդյո՞ք այսպիսով լուծում է ստանում գեներալիտետ-քաղաքական իշխանություն լարվածությունը։

-Ինչպես ես տեսնում եմ՝ մենք այդ ճգնաժամի հանգուցալուծման վերջին փուլում ենք գտնվում։ Այո՛, հանգուցալուծվելու է, չի կարող չհանգուցալուծվել, որովհետև դրա չհանգուցալուծման հետևանքները բոլորին պարզ են և հասկանալի։ Ինչպես նաև պարզ է ու հասկանալի է, որ դա որևէ մեկին՝ բացի մեր պետության ուղղակի թշնամիներից, ձեռնտու չէ։

-Այն գեներալներն ու գնդապետները, որ վարչապետի հրաժարականին էին միացել, ինչպե՞ս են աշխատելու այս կառավարության հետ։

-Գիտեք ինչ կա՝ գեներալներն ու գնդապետները վարչապետի հետ չեն աշխատում։ Նրանք աշխատում են Գլխավոր շտաբի պետի հետ, պաշտպանության նախարարի հետ և, ընդհանրապես, բանակը գործ չունի քաղաքականության մեջ և քաղաքացիական իշխանության հետ, որին նա ենթարկվում է։ Դրա հետ կապված այս բոլոր հրապարակային հայտարարություններն ուղղակի անընդունելի են։ Նրանց առաքելությունը ոչ թե քաղաքական իշխանությանը գնահատականներ տալն է, այլ նրանց առաքելությունը ներկայում այն է, որ պետք է ունենանք 5-րդ սերնդի պատերազմին պատրաստ բանակ՝ համապատասխան կարողություններով։ Այդ իմաստով նրանց առնչությունները քաղաքական իշխանության հետ պետք է վերաբերվեն բացառապես այդ խնդրի լուծմանը։

-Արտահերթ ընտրությունների մասին․ քաղաքական իշխանության վրա եք դնում այդ ընտրությունները կազմակերպելու պատասխանատվությունը։ Բայց ինչպե՞ս հասնել դրան, երբ չկա համաձայնություն քաղաքական ուժերի միջև։ Ընդհանրապես՝ անհրաժե՞շտ է հասնել այդ համաձայնությունը։

-Իմ տպավորությամբ՝ համաձայնության հասնելու ռեսուրսը վերջանալու վրա է։ Բայց մյուս կողմից էլ՝ իշխանությունը պետք է շատ մեծ հույս չունենա, որ նրան կհաջողվի հասնել այդ կոնսեսուսին։ Ի վերջո, այդ ուժերն այսօր սպասարկում են միանգամայն այլ օրակարգ, որը դեմ է մեր պետության, քաղաքացիների շահերին։ Իշխանությունը պետք է նախաձեռնությունը վերցնի իր ձեռքը և այդ օրակարգը տանի առաջ՝ օրենքի տառին և ոգուն համապատասխան։ Այդ իմաստով, պետք է շուտափույթ ընդունվի Սահմանադրության դրույթը, որը թույլ կտա ԱԺ-ին ինքնալուծարվել և հարցը փակվի։ Ընտրությունները պետք է կայանան որոշակի նախապատրաստական աշխատանքից հետո՝ դատական համակարգում մեծ աղբահանությունը պետք է շատ արագ իրականացվի։ ԲԴԽ-ի նոր անդամները՝ Գագիկ Ջհանգիրյանը, Դավիթ Խաչատուրյանը բաց տեքստով ասացին, որ դրա համար չկա որևէ սահմանադրական խոչընդոտ՝ ի հեճուկս այն իրավաբանների, որոնք խորհրդատվություն են մատուցում գործադիր իշխանությանը։ Իրավիճակը հանդարտեցնելուց հետո երկիրը պատրաստ կլինի ընտրության։ Իսկ հանդարտեցնել ասելով՝ ես նկատի ունեմ առերևույթ հանցագործություն արած մարդիկ պետք է մեկուսացվեն, ես նկատի ունեմ՝ բռնության, ահաբեկչության, բանակի՝ իշխանությանը չենթարկվելու և հաշվեհարդարի կոչեր անելը։ Այդ տոքսիկ սեգմենտը պետք է քրեորեն հետապնդվի, գլխով պետք է պատասխան տան այդ կոչերի համար և իրավիճակի հանդարտացումից հետո երկիրը պետք է գնա ընտրությունների։

-Լավատես չե՞ք, որ կհանդարտվի իրավիճակը։ Կարծես թե լարումը քաղաքական բրենդ և մարտավարություն է դարձել։

-Ո՞վ է ասել, որ բնակչության 0․001 տոկոսը պետք է պարտադրի իր օրակարգը քաղաքացիների ջախջախիչ մեծամասնությանը՝ բռնի գործողությունների, պետական ինստիտուտների մուտքներն արգելափակելու միջոցով։ Ո՞վ է իրենց տվել այդ բարոյական իրավունքը։

-Վազգեն Մանուկյանին մեղադրանք առաջադրվեց Քրեական օրենսգրքի 301-րդ հոդվածով։ Նրա կողմնակիցները հայտարարում են քաղաքական հալածանքի մասին իրենց առաջնորդի նկատմամբ։ Ի՞նչ կասեք։

-Նա պետք է մեկուսացվի հասարակությունից։ Դա քաղաքական հալածանք չէ, տեռորի կոչեր անելն ընդդիմադիր գործունեությո՞ւն է։ Ուրեմն՝ այդ անձը, որ նաև Նաիրի Հունանյանի քաղաքական հայրիկն է, պետք է զրկվի տեռորի կոչեր անելու հետագա հնարավորություններից։ Հարուցված է քրեական գործ, որը պետք է հասնի տրամաբանական ավարտին։

Հարցազրույցն ամբողջությամբ՝ տեսանյութում։

Ռոբերտ Անանյան