11.10.2026 | 23:33
Հակոբ Շարբաթյանը՝ բռնցքամարտի Եվրոպայի Մ-17 չեմպիոն. ՏԵՍԱՆՅՈՒԹ
ԵՄ-ն պատժամիջոցների նոր փաթեթ է պատրաստում երրորդ երկրներում մարդու իրավունքների լուրջ ոտնահարումների համար
Քաղաքականություն
10.03.2021 | 18:08
Եվրամիությունը պատժամիջոցների նոր փաթեթ է պատրաստում երրորդ երկրներում մարդու իրավունքների լուրջ ոտնահարումների առնչությամբ՝ համաձայն նոր գործիքի, այսպես կոչված, եվրոպական «Մագնիտսկու ակտի»: Տույժերի փաթեթի շուրջ աշխատանքները պետք է ավարտվեն մինչև մարտի 22-ը՝ ԵՄ արտգործնախարարների հաջորդ հանդիպումը, հայտնում է DW-ի ռուսական ծառայությունը:
Ինչպես նշում է գործակալությունը, պետք է նոր պատժամիջոցներ սահմանվեն, առաջին հերթին, ասիական և աֆրիկյան երկրներից անձանց, ինչպես նաև մարդու իրավունքների խախտումների համար պատասխանատու ռուսաստանցիների դեմ, որոնք նախկինում չեն հայտնվել նախորդ պատժամիջոցների փաթեթի շրջանակներում:
Ենթադրվում է, որ եվրոպական «Մագնիտսկու ակտով» պատժամիջոցների ընդլայնման մասին որոշումը արագ կկայացվի, և շուտով ուժի մեջ կմտնեն տույժերը՝ ներառյալ ԵՄ մուտքի արգելքը և ակտիվների սառեցումը:
Միևնույն ժամանակ, մինչև պատժամիջոցների ուժի մեջ մտնելը, գաղտնի կմնա, թե մարդու իրավունքների ոտնահարման որ դեպքեր են քննարկվելու և ովքեր են հայտնվելու «սև ցուցակում»:
Այսպիսով, ԵՄ-ն ցանկանում է կանխել իր տարածքից ակտիվների դուրսբերումը մինչ այդ միջոցների ուժի մեջ մտնելը:
Տաթև Ֆռանգյան
