Շիրակի մարզում կորոնավիրուսով վարակման դեպքերի աճ կա․ իրավիճակը, սակայն, կայուն է

Հանրապետությունում կորոնավիրուսով վարակվածների թվի աճ է նկատվում, մասնագետները նաև խոսում են համավարակի հնարավոր երրորդ ալիքի մասին։ Այս առումով Շիրակի մարզում, որտեղ հիվանդացության ցուցանիշը զգալի նվազել էր, այժմ փոքր-ինչ աճ կա։
«Այս պահին մարզում տանը բուժվող 52 հիվանդ ունենք, իսկ «Գյումրի» բժշկական կենտրոնի տրիաժ բաժանմունքում՝ ընդամենը 4 հիվանդ։ Ճիշտ է՝ չնչին ակտիվացում կա, ասենք՝ մեկ շաբաթ առաջ ունեինք 42 հիվանդ, հետո՝ 46»,- Factor.am-ի հետ զրույցում ասաց Շիրակի մարզպետարանի առողջապահության ու սոցիալական ապահովության վարչության պետի ժամանակավոր պաշտոնակատար Լեյլի Ասլանյանը։

Նա նաև նշեց, որ պատկերը, որպես այդպիսին, մտահոգիչ չէ, ընդհանուր իրավիճակը մարզում կառավարելի է։
Հունվարի կեսերից մարզի բուժհաստատությունները՝ Գյումրու ինֆեկցիոն հիվանդանոցն ու «Գյումրի» բժշկական կենտրոնի քովիդ բաժանմունքը դադարեցրել են ստացիոնար ծառայությունը։ Ըստ մարզպետարանի պատասխանատուի՝ հիմա նույնպես ստացիոնարը չի գործում, հիվանդների թիվն այնպիսին չէ, որ այս պահին ծառայությունը կրկին ծավալվի։

Լեյլի Ասլանյանի խոսքով՝ այս պահին սուր շնչառական վարակների սեզոնային ակտիվություն կա, դիմելիության ակտիվացումն էլ ավելի շատ դրանով է պայմանավորված։

«Եղել են ջերմող հիվադններ, սուր շնչառական վարակի կլինիկայով հիվանդներ, որոնց վերցրել ենք նմուշառման։ Կոնկրետ երեկ 32 նմուշառում է եղել Հիվանդությունների վերահսկման և կանխարգելման ազգային կենտրոնում, և 32 նմուշառումից ունեցել ենք 4 դրական դեպք։ Դա մեծ թիվ չէ»,- վստահեցրեց Շիրակի մարզպետարանի առողջապահության ու սոցիալական ապահովության վարչության պետի ժամանակավոր պաշտոնակատարը՝ նշելով, որ համաճարակային առումով մարզում կայուն իրավիճակ է։

Էմմա Չոբանյան