«Ով դեմ է ընտրություններին, դեմ է գնում բանակին». Էդմոն Մարուքյան. ՏԵՍԱՆՅՈՒԹ

Հանրապետության նախագահը դիմել է ՍԴ՝ վիճարկելու Օնիկ Գասպարյանին պաշտոնից ազատելու հրամանագրի համար հիմք ծառայած օրենքի դրույթները: «Հիմա գնդակը Սահմանադրական դատարանի դաշտում է»,- այս մասին ԱԺ-ում լրագրողների հետ զրույցում ասաց «Լուսավոր Հայաստան» խմբակցության ղեկավար Էդմոն Մարուքյանը՝ հավելելով, որ ՍԴ-ն կարող է որոշել, որ Օնիկ Գասպարյանը պետք է շարունակի պաշտոնավարել. պետք է սպասել ՍԴ որոշմանը:

Անդրադառնալով խորհրդարանական ընտրություններ անցկացնելու վերաբերյալ ԼՀԿ առաջարկին՝ Մարուքյանը նշեց, որ այն թողնվել է անպատասխան և արդեն ժամանակավրեպ է:

«Ճգնաժամից հանգուցալուծման ելքը հետևյալն էր՝ ԳՇ-ն թողնել հանգիստ, Օնիկ Գասպարյանին թողնել իր տեղում, և ի պատասխան այդ քայլի, մենք պատրաստ էինք հուշագիր կնքել… Մեր մեկնած ձեռքը թողնվել է անպատասխան: Հուշագիր այլևս չի լինելու, այս փուլում արդեն ժամանակավրեպ է… Իսկ նոր առաջարկ եթե լինի, այդ մասին կհայտարարվի կուսակցության կառավարման խորհրդում քննարկվելուց հետո միայն:

Բայց արտահերթ ընտրությունների անցկացման օրակարգը լինելու է առաջնային մեր երկրում: Հետաքրքիր է, թե այն մարդիկ, որոնք պաշտպանում էին Օնիկ Գասպարյանին, բայց դեմ էին արտահերթ ընտրություններին, հիմա ինչ են ասելու»,- նշեց Մարուքյանը:

«Ով դեմ է արտահերթ ընտրությունների անցկացմանը, դեմ է նաև Զինված ուժերին»,- ընդգծեց ԼՀԿ ղեկավարը՝ հավելելով, որ եթե չլինեն արտահերթ ընտրություններ, երկիրը մխրճվելու է խոր ճգնաժամի մեջ:

Մանրամասները՝ տեսանյութում: