Կոնգրեսականը բարձրացրել է հայ գերիների հարցը, Բաքվում և Ստամբուլում արգելել են կանանց երթերը. Լուրեր

ԱՄՆ Ներկայացուցիչների պալատի անդամ, Կոնգրեսի հայկական հարցերով հանձնախմբի համանախագահ Ֆրանկ Փալոնը անդրադարձել է Ադրբեջանում պահվող հայ գերիների խնդրին: Փալոնը նշել է, որ դրանով Բաքուն խախտում է միջազգային իրավունքը: Կոնգրեսականը հայտնել է, որ անձամբ խոսել է ԱՄՆ նախագահ Ջո Բայդենի վարչակազմի հետ `այս խնդիրները անհապաղ լուծելու համար։

—

Կանանց տոնի առիթով նրանց շնորհավորել են Հայաստանի բարձրագույն պետական պաշտոնյաները, հոգևոր և քաղաքական գործիչները։ Նախագահ Արմեն Սարգսյանը նշել է, որ պատահական չէ, որ հայկական արժեհամակարգում կնոջ հանդեպ վերաբերմունքը սիրո, հարգանքի ու մեծարանքի վրա հիմնված խոր արմատներ ունի:

Վարչապետ Նիկոլ Փաշինյանը և փոխվարչապետ Տիգրան Ավինյանը առանձնահատուկ նշել են պատերազմի ընթացքում զոհվածների մայրերի, կանանց, քույրերի նկատմամբ ակնածանքը։

Ամենայն Հայոց Կաթողիկոս Գարեգին Երկրորդը նշել է, որ անփոխարինելի է կնոջ դերը ընտանիքի ամրության, քրիստոնեական արժեքներով և հայրենյաց ավանդներով զավակներին կրթելու գործում։

—

Թուրքիայում ու Ադրբեջանում արգելել են կանանց իրավունքների պաշտպանությանը նվիրված միջոցառումները։ Ադրբեջանի իշխանությունները Բաքվում քայլերթ նախաձեռնողներին զգուշացրել են, որ ակցիան արտոնված չէ ու կկանխվի ոստիկանության կողմից։ Իսկ Թուրքիայի ֆեմինիստները պլանավորել են քայլերթով անցնել Ստամբուլով, սակայն այստեղ ևս իշխանություններն արգելել են նման միջոցառումները։