30.06.2026 | 19:14
36 ժամ ջուր չի լինի Երևանի մի շարք հասցեներում
20 զոհ, 500 վիրավոր ու բազմաթիվ անհետ կորածներ․ Հասարակածային Գվինեայում պայթել է ռազմաբազաներից մեկում պահվող դինամիտը
Քաղաքականություն
08.03.2021 | 13:24
Հասարակածային Գվինեայում դինամիտի հզոր պայթյուն է տեղի ունեցել, որը պահվում էր երկրի տնտեսական մայրաքաղաքի ռազմաբազաներից մեկում ՝ Բատա քաղաքում: Առնվազն 15 մարդ զոհվել է, շուրջ 500-ը վիրավորվել, գրում է BBC-ի ռուսական ծառայությունը:
Մինչ այդ Reuters գործակալությունը, վկայակոչելով տեղական հեռուստաընկերություններից մեկին, հայտնել էր, որ առնվազն 20 մարդ է զոհվել Հասարակածային Գվինեայի հյուսիս-արևմուտքում գտնվող Բատա քաղաքում տեղի ունեցած չորս հզոր պայթյունների հետևանքով:
Մինչդեռ, ինչպես պարզաբանում է BNO News հոլանդական լրատվական գործակալությունը, հղում կատարելով Հասարակածային Գվինեայի Առողջապահության նախարարությանը, ողբերգության պատճառով առնվազն 300 մարդ է վիրավորվել: Միևնույն ժամանակ, մեծ թվով մարդիկ համարվում են անհետ կորած. հավելել են Առողջապահության նախարարությունից:
Տեղի TVGE հեռուստաընկերությունը հաղորդել է՝ պայթյունները հանգեցրել են մահվան դեպքերի, վնասվածքների, ավերածությունների և նյութական մեծ վնասների: Հեռուստաալիքը ցույց է տվել, թե ինչպես են զոհերին դուրս բերում շենքերի ավերակների կույտերի տակից: Իշխանությունները մարդկանց հորդորել են արյուն հանձնել: Տեղեկություններ կան, որ հիվանդանոցները գերբեռնված են վիրավորներով։ Տեղի լրատվամիջոցները տեսանյութ են հրապարակել, որոնցում երևում է, թե ինչպես են մարդիկ փախչում աղետի գոտուց: Կադրերում երևում են պոկված տանիքներով տները:
Ականատեսները պատմել են, որ առաջին երեք պայթյունները տեղի են ունեցել գրեթե միաժամանակ, տեղի ժամանակով ժամը 15: 00-ին։ Երկու ժամ անց տեղի է ունեցել չորրորդ պայթյունը:
Հավելենք, որ Բատան Հասարակածային Գվինեայի տնտեսական մայրաքաղաքն է և երկրի ամենամեծ քաղաքը:
Տաթև Ֆռանգյան
