Ամուլսարը բացելու՝ վարչապետի հայտարարությունը քաղաքական ճնշումների արդյունք է․ Նազելի Վարդանյան. ՏԵՍԱՆՅՈՒԹ

Factor TV-ի հարցազրույցը էկոլոգիական իրավունքի մասնագետ Նազելի Վարդանյանի հետ

-«Մեծ է հավանականությունը, որ Ամուլսարի հանքը կբացվի»,- օրերս հայտարարեց վարչապետ Նիկոլ Փաշինյանը։ Ըստ Ձեզ՝ ինչո՞ւ է Կառավարությունը եկել այս եզրահանգման։

-Հանքը չի բացվելու, դա միանշանակ է, որովհետև դա ժողովրդի կամքն է, և այս պարագայում, երբ այդ թույլտվությունները տրվել են մեր բնապահպանական օրենքների խախտումներով և բոլոր բնապահպանական միջազգային կոնվենցիաների խախտումներով։ Բազմաթիվ կոռուպցիոն քրեական գործեր կան հարուցված և՛ հողերի վաճառքի, և՛ ապօրինի հանքարդյունաբերության վերաբերյալ, մեկ այլ քրեական գործ կա տեսչական մարմինների ստուգումների շնորհիվ։ Այսինքն՝ հնարավոր չէ առանց նոր փորձաքննության այդ հանքը գործարկել։ Բացի այդ՝ «Շրջական միջավայրի վրա ազդեցության գնահատման և փորձաքննության մասին» օրենքում նշված է, որ եթե ձեռնարկողը մեկ տարվա ընթացքում չի սկսում այն գործունեությունը, որի համար ինքը ստացել է փորձաքննություն, ապա այդ փորձաքննական եզրակացությունը ուժը կորցնում է։ Փաստորեն, «Լիդիան Արմենիան» այն ստացել է 2016 թվականի ապրիլի 29-ին ոսկեբեր քվարցիտների հանքարդյունահանման համար, և պետք է մինչև 2017թ․ապրիլի 29-ը ոսկեբեր քվարցիտներ հանքարդյունահաներ, որևէ մեկն իրենց այդ ընթացքում չի խոչընդոտել։ Մեկ տարի հետո են ճանապարհները փակվել, և ուժը կորցրել է այդ փորձաքննությունը՝ ըստ օրենքի։

-Բայց Դուք բացառո՞ւմ եք, որ այս ամռանից «Լիդիան Արմենիան» սկսի աշխատանքներ տանել Ամուլսարի տարածքում․ ընկերությունից այդպիսի հայտարարություն եղավ։

-Ես ողջամտության տրամաբանությունից ելնելով եմ բացառում, որովհետև առաջինը՝ ասացի, որ ուժը կորցրած եզրակացության հիման վրա չի կարող թույլտվություն տրվի, երկրորդ՝ նոր հանգամանքներ կան, որ այդ գործոնների պարագայում պետք է ուժը կորցներ, և մենք դատական գործ ունենք այդ հիմքով, կոռուպցիոն գործերը քննվում են տարիներով և չեն ավարտվում, դրանք էլ նույնպես խոչընդոտ են, և այս քաղաքական իրավիճակում ես չեմ կարծում, որ ողջամտության և հեռատեսության սկզբունքներից ելնելով՝ նպատակահարմար է մեկ կարևոր խնդիր բարձրացնել և նորից թեժ կետ ստեղծել մեր երկրում ու պառակտել հասարակությանը նաև այս հիմքով։

-Եթե «Լիդիան Արմենիան» սկսի աշխատանքներն Ամուլսարի տարածքում, ի՞նչ եք անելու Դուք և բնապահպանները։

-Ոչ միայն բնապահպանները, ջերմուկցիները շատ վճռական են այս հարցում, իրենք իրենց դիրքորոշումն ասել են։ Եվ ոչ միայն ջերմուկցիները, նաև Վայոց ձորի բնակչությունը՝ 12․000 ստորագրություն է ներկայացվել համապատասխան ավագանիներին՝ Ջերմուկի, Եղեգնաձորի, որոնք հավանություն են տվել։ Այդ կամքին հակառակ գնալն այս պայմաններում, այն էլ՝ պատերազմից հետո, որ ազգային անվտանգության հարց է, եթե մինչ այդ մենք էկոլոգիական ռիսկերի մասին էինք խոսում, և սահմանը 25 կիլոմետրի վրա էր Նախիջևանից, հիմա Սյունիքի կողմից արդեն 5-6 կիլոմետրի վրա էԱմուլսարը, և այդպիսի օբյեկտ ունենալը շատ վտանգավոր է։ Տասը տարվա մեջ նախատեսվում է 100․000 տոննայի ցիանիդային հարթակ ունենալ այդտեղ։ Այդպիսի վտանգավոր օբյեկտ ենք ունենալու, այն դեպքում, որ այդտեղ կա երկու ջրամբար՝ Սպանդարյանի և Կեչուտի ջրամբարը, երկու թունել, երկու պատվար, մեկ ամբողջ Սևանն է վտանգված և, փաստորեն, ջրային ավազանի, մեր ջրային պաշարների 80 տոկոսն է վտանգված։

-Երբ վարչապետը հայտարարում է, որ Ամուլսարի հանքը բացելու հավանականությունը մեծ է, կարծում եք՝ չե՞ն հաշվարկել այդ ռիսկերը։

-Չեն հաշվարկել։ Ես կարծում եմ՝ սա քաղաքական ճնշումների արդյունք է։

-Վարչապետի հայտարարությո՞ւնը նկատի ունեք։

-Այո՛, սա էլի քաղաքական ճնշումների արդյունք է։ Ես կարծում եմ՝ ողջամտությունը կհաղթի։

Հարցազրույցն ամբողջությամբ՝ տեսանյութում։

Ռոբերտ Անանյան