Ապացույցներ ներկայացրեք, որ ԳՇ պետը հայտարարությունը արել է Սարգսյանի հրամանով․ Մարուքյանը՝ Փաշինյանին. ՏԵՍԱՆՅՈՒԹ

Խորհրդարանում «Լուսավոր Հայաստան» խմբակցության ղեկավար Էդմոն Մարուքյանը ԱԺ-Կառավարություն հարցուպատասխանի ժամանակ վարչապետին հորդորեց ապացույցներ ներկայացնել, որ ԳՇ պետը Սերժ Սարգսյանի հրամանով է պահանջել Փաշինյանի հրաժարականը:

Մարուքյանը նաև հարցրեց՝ վարչապետը չի՞ քննարկել անձամբ ԳՇ գնալու և գեներալների հետ խոսելու հարցը: Նա նաև հետաքրքրվեց՝ ի՞նչ է տեղի տեղի ունեցել Փաշինյանի և նրա «մարտական եղբայրների» միջև, որ գլխավոր հրամանատրին ընդդիմանում է բանակի ամբողջ ղեկավար կազմը:

Վարչապետին ուղղված հարցերին պատասխանեց փոխվարչապետ Տիգրան Ավինյանը: Նա նշեց, որ հարցերի հավելյալ վարչապետի կողմից հայտարարություններ են արվել, և պարզաբանման կարիք չկա: «Վարչապետը հարկ եղած չափով հայտարարություններ է արել: Եթե հավելյալ պարզաբանման կարիք լինի՝ անդրադարձ կլինի»,- նշեց Ավինյանը:

«Պարոն վարչապետն այստեղ է, զարմանում եմ՝ ինչո՞ւ ինքը չի պատասխանում: Հրապարակային հայտարարություն է արվել, նման հայտարարություն ցանկացած գերատեչության ղեկավարի մասին կարող է արվել, վաղը կարող է ասեք՝ Արարատ Միրզոյանը չգիտեմ ինչ է արել Սերժ Սարգսյանի հրամանով, կարող է ասեք՝ Տիգրան Ավինյանն է արդեն Սերժ Սարգսյանին ենթարկվում:

Անհրաժետություն կա պարզաբանման, ձևավորված է հանրային ակնկալիք, որ եղբա՛յր, բան եք ասել, ձեր ասածն ապացուցեք: Եթե անհիմն մեղադրանք է դա, այստեղ աձանագրենք, անցնենք առաջ», – արձագանքեց Մարուքյանը:

«Եթե հարկ լինի ավելի մանրամասնել կամ պարզաբանել, վարչապետը դա կանի»,- նշեց Ավինյանը:

Մանրամասները՝ տեսանյութում: