17.09.2026 | 13:52
Հորս մասով փորձում է հաճոյանալ Ալիևին. Լևոն Քոչարյանը՝ Փաշինյանի մասին․ ՏԵՍԱՆՅՈՒԹ
ԱՄՆ-ի 180 օրենսդիր կոչ է անում Բայդենին՝ Թուրքիային պարտադրել հետևել մարդու իրավունքների պաշտպանությանը
Քաղաքականություն
02.03.2021 | 16:43
ԱՄՆ Կոնգրեսի Ներկայացուցիչների պալատի ավելի քան 180 անդամից բաղկացած երկկուսակցական խումբը պետքարտուղար Էնթոնի Բլինկենին կոչ է արել ժողովրդավարությունից ավելի ու ավելի հեռացող և հակաամերիկյան քաղաքականություն վարող Թուրքիային պարտադրել հետևելու մարդու իրավունքների պաշտպանությանը, գրում է Asbarez-ը՝ հղում կատարելով Ամերիկայի հայ դատի հանձնախմբին։
«Մենք միանում ենք մեր կոալիցիոն գործընկերներին, ակտիվիստներին և ողջ Ամերիկայից մեր դաշնակիցներին՝ ողջունելով այս հզոր, երկկուսակցական կոչը` ԱՄՆ-Թուրքիա հարաբերությունների հիմնական ուղղությունը շտկելու համար», – ասել է ANCA- ի գործադիր տնօրեն Արամ Համբարյանը:
«Մենք պետք է դադարեցնենք ամերիկյան սիրաշահող քաղաքականությունը Անկարայի նկատմամբ և սկսենք Անկարային պատասխանատվության ենթարկել իր ներքին չարաշահումների և տարածաշրջանային ագրեսիայի համար»:
Նամակում օրենսդիրները նշել են, որ Թուրքիայի նախագահ Էրդողանը և նրա «Արդարություն և զարգացում» կուսակցությունն իրենց իշխանության շուրջ 20 տարիների ընթացքում թուլացրել են երկրի դատական համակարգը, քաղաքական դաշնակիցներին նշանակել են առանցքային ռազմական և հետախուզական պաշտոններում, ճնշել են խոսքի ազատությունը, անարդարացիորեն բանտարկել են քաղաքական ընդդիմախոսներին, լրագրողներին և փոքրամասնությունների ներկայացուցիչներին։
Նամակում նշվում է, որ 2016 թվականից ի վեր քաղաքական ընդդիմությանը ճնշելու համար բանտարկվել կամ կալանավորվել է ավելի քան 80 000 թուրք քաղաքացի, փակվել է 1500-ից ավելի հասարակական կազմակերպություն՝ ճնշելու քաղաքական ընդդիմությանը։
2017 թվականի մայիսի 16-ին Համբարյանը հրապարակել էր Վաշինգտոնում ՝Թուրքիայի դեսպանի նստավայրի մոտերքում խաղաղ ցուցարարների վրա Էրդողանի անվտանգության աշխատակիցների և աջակիցների կողմից հարձակման տեսագրությունը։ Համբարյանի հրապարակած տեսանյութում երևում էր, որ Էրդողանի կողմնակից ուժերը հատում են ոստիկանական գիծը և ծեծում խաղաղ ցուցարարներին՝ տարեց տղամարդկանց և մի քանի կանանց: Հարձակումների մասին «Ամերիկայի ձայն»-ի տեսանյութում հիմնավոր ապացույցներ էր բերվում այն մասին, որ նախագահ Էրդողանն անձամբ էր պատվիրել հարձակումը:
Դաժան ծեծի գործով մեղադրանք է առաջադրվել 19 հանցագործի, որոնց թվում են Թուրքիայի նախագահ Էրդողանի անվտանգության 15 աշխատակից, երկու կանադացի, ովքեր ըստ հաղորդումների՝ վերադարձել են Թուրքիա, և երկու ամերիկաբնակ թուրք:
Տաթև Ֆռանգյան
