Քաշաթաղում վերականգնված ՀԷԿ-ը էլեկտրաէներգիա կմատակարարի Աղավնոյին, Բերձորին ու Ստեփանակերտին

Քաշաթաղի Աղավնո գետի վրա՝ ռուս խաղաղապահների կողմից վերականգնված հիդրոէլեկտրակայանն ունի 1,7 մեգավատ դրվածքային հզորություն: Արտադրված էլեկտրաէներգիան՝ միանալով ընդհանուր ցանցին, մատակարարվելու է նաև Աղավնո համայնքին, Բերձորին ու Ստեփանակերտին: Այս մասին «Արմենպրես»-ի հետ զրույցում տեղեկացրել է Արցախի տարածքային կառավարման և ենթակառուցվածքների նախարարի տեղակալ Արմեն Թովմասյանը:

«Վերականգված հիդրոէլեկտրակայանից արտադրված էլեկտրաէներգիան միանում է Հայաստանից դեպի Արցախ եկող հոսանքի ընդհանուր ցանցին, որից հետո հասնում՝ Աղավնո, Բերձոր, Ստեփանակերտ: Ներկայումս՝ Արցախի վերահսկողության ներքո գտնվող ՀԷԿ-երն ունեն ընդհանուր առմամբ մոտ 75 մեգավատ հզորություն: Քաշաթաղում վերականգնված ՀԷԿ-ից եկող էլեկտրաէներգիան գումարվելով դրան՝ ինքնաբավության մակարդակի բարձրացման խնդրին որոշակի լուծում է տալիս: Հայաստանից եկող էլեկտրաէներգիայի խափանումների դեպքում՝կկարողանանք տեղում որոշ չափով ապահովել էլեկտրամատակարարումը»,-հայտնել է Թովմասյանը:

Անդրադառնալով Արցախում էլեկտրամատակարարման վերականգնման ներկա աշխատանքներին նախարարի տեղակալը տեղեկացրել է,որ մասնավորապես Մարտունու էլեկտրամատակարարման ապահովման նպատակով՝ Ստեփանակերտի ենթակայանից 10 կՎտ լարմամբ, օդային՝ 3 գիծ է անցկացվել:

«Այդուհանդերձ՝ Մարտունիում անջատումներ դեռ լինում են, քանի որ,ընդհանուր՝ 1 մեգավատ հզորությունը դեռևս անբավարար է, իսկ դրանից առավել այդ գիծն ունակ չէ ապահովել: Ներկայում ծրագրային աշխատանքներ են տարվում Մարտունի գնացող նախկին օդային գիծը վերականգնելու ուղղությամբ: Մի փոքր ֆինանսական խնդիրներ կային,ինչ այժմ լուծման փուլում է»,-մանրամասնել է Թովմասյանը:

Նրա խոսքով աշխատանքների մեկնարկի հստակ ժամկետն առայժմ հայտնի չէ,սակայն սկսելու դեպքում՝ ավարտին կհասցնեն 2-3 ամսում: