Քաղաքականություն
24.02.2021 | 20:17
Թուրքիայի նախագահ Ռեջեփ Թայիփ Էրդողանը իշխող «Արդարություն ու զարգացում» կուսակցության խորհրդարանական խմբակցության նիստում հայտարարել է, որ չեն պատրաստվում ինչ-որ մեկից թույլտվություն խնդրել՝ տարածաշրջանում կատարելու «եղբայրական, ընկերական, մարդկային պարտականությունները, որոնք ժառանգել են իրենց նախնիներից»։
«Բալկաններից մինչև Թուրքեստան, Կովկասից մինչև Աֆրիկա, մենք շարունակելու ենք լինել մեր եղբայրների կողքին՝ թե՛ լավ, թե՛ վատ օրերում»,- ասել է Էրդողանը։
Էրդողանի այս խոսքերն ուշագրավ են այն համատեսքտում, որ դրանք, կարծես, յուրօրինակ պատասխան են ՌԴ արտգործնախարար Սերգեյ Լավրովի այն հայտարարությանը, որ Թուրքիան Մեծ Թուրան ստեղծելու նպատակ չունի։
Հիշեցնենք, որ ՌԲԿ հեռուստաալիքին տված հարցազրույցում Լավրովն ասել էր, թե չի համարում, որ «Թուրքիան Մեծ Թուրան վերազգային կազմավորում ստեղծելու նպատակ ունի»։
«Եթե խոսենք Մեծ Թուրանի՝ որպես վերազգային կազմավորման մասին պատմական իմաստով, չեմ կարծում, որ Թուրքիան հետապնդում է նման նպատակ։ Չեմ տեսնում, որ իրականության մեջ նախկին ԽՍՀՄ ու ներկայում անկախ պետությունները կարող են այդ գաղափարն ինչ-որ կերպ սատարել։ Ընդհակառակը, նրանց արտաքին քաղաքականության ամբողջ պաթոսը նրանում է, որ ամրացնեն իրենց ազգային պետությունները»,- ասել էր ՌԴ ԱԳ նախարարը։
Էմմա Չոբանյան
