30.03.2025 | 21:53
Սարիկ Մինասյանի բնակության թաղամասի ընտրատեղամասում նրա քվեաթերթիկը պատռել են
ԵՐԵՎԱՆԻ ԺԱՄԱՆԱԿՈՎ. Մենք ընդդիմություն չունենք. այն պետք է կառուցող լինի, ոչ թե քանդող. Հաղթանակ Շահումյան. ՏԵՍԱՆՅՈՒԹ
Քաղաքականություն
24.02.2021 | 21:33
«Դիմացինին սևացնելով՝ սպիտակ չես դառնա, ես չեմ ընդունում այն թշնամանքը, որ կա մեր երկրում: Եթե կա օրենք, թող գործի, բայց հարաբերությունները չպետք է դառնան շուկայական, մեկը մյուսին չպետք է վարկաբեկեն»,- Factor TV-ի հետ զրույցում նման տեսակետ է հայտնում գեղանկարիչ Հաղթանակ Շահումյանը` անդրադառնալով ՀՀ երրորդ նախագահ Սերժ Սարգսյանի և ՀՀ վարչապետ Նիկոլ Փաշինյանի փոխադարձ որակումներին` «կապիտուլյանտ» և «մերժված»:
Ինչ վերաբերում է ընդդիմությանը, մասնավորապես՝ «Հայրենիքի փրկության շարժմանը», մեր զրուցակիցը նկատում է՝ ծայրահեղ մոտեցումներն ավելի են սրելու հակասությունները հանրության շրջանում։
«Անգամ եթե կա չարիք մեր իրականությոնում, այդ չարքիը չպետք է դառնա սնունդ՝ հակասություններ սերմանելու համար: Մենք ընդդիմություն չունենք. այն պետք է կառուցող լինի, ոչ թե քանդող: Այսօրվա ընդդիմությունը գնում-հարձակվում է պետական կառույցների վրա, փողոցում հրահրում է անկարգություններ, աղբ է շաղ տալիս աջ ու ձախ. դա ինձ համար ընդունելի չէ… Ասում են՝ սրան հանենք, նրան դնենք, բայց որևէ հուսադրող ծրագիր, մտահղացում չկա»,- հավելում է նա:
Շահումյանի խոսքով՝ այսօր մենք աջ ու ձախ թշնամիներ ենք փնտրում. կարելի է կարծել, թե պատմականորեն մեր թշնամիները քիչ են. «Ընդդիմությունը պետք է պայքարի իշխանության անօրինականությունների դեմ, ոչ թե ժողովրդին թշնամացնի: Այսօր մեր ժողովուրդը բաժանված է խմբերի, անգամ նույն ընտանիքում կարելի է տեսնել «Սարոյան եղբայրների» հարաբերություններ»:
Հաղթանակ Շահումյանի կարծիքով՝ մտավորականության դերը պետք է լինի հանրության շրջանում համերաշխության հաստատումը. «Ինձ համար անընդունելի են առանձին մտավորականների հավաքները։ Ամեն մեկը մի բևեռի է պաշտպանում, այնինչ մեր երկիրը մի մեծ ընտանիք է, և բոլորս պետք է մեր անձնական վրդովմունքը մի կողմ թողնելով՝ անկախությունը փնտրենք երկրի զարգացման մեջ»:
Հարցազրույցն ամբողջությամբ՝ տեսանյութում:
Աննա Բաբաջանյան
