Վախենալու է՝ ինչպե՞ս է ԱԻՆ-ը բացառում ուժգին երկրաշարժի, աղետի հնարավորությունը ՀՀ-ում․ Ավանեսով. ՏԵՍԱՆՅՈՒԹ

Պետական կառույցների ներկայացուցիչներն ու մասնագետները «Թաքստոցներ և ապաստարաններ. հրատապ լուծում պահանջող խնդիրներ» թեմայով առցանց քննարկման ժամանակ քննարկեցին Երևանում և ՀՀ մյուս քաղաքաներում քաղաքացիական բնակչության պաշտպանության, մասնավորապես, թաքստոցներին և ապաստարաններին վերաբերող առկա հիմնախնդիրները և դրանց լուծման ճանապարհները:

Մասնագետների կարծիքով՝ խնդիրը կարգավորելու համար նաև օրենսդրական փոփոխությունների անհրաժեշտություն կա «Քաղաքացիական պաշտպանության մասին» օրենքում:

Վ. Բրյուսովի անվան պետական համալսարանի Ֆիզկուլտուրայի և քաղպաշտպանության ամբիոնի վարիչ, Երևանի ավագանու անդամ Էռնեստ Ավանեսովն ընդգծեց, որ խնդիրները շատ են, լուծումները պետք է լինեն համալիր, և այդ աշխատանքները պետք է ղեկավարի ԱԻՆ-ը:

Նա նաև նշեց, որ բյուջեի քննարկման ժամանակ առաջարկներ են ներկայացվել թաքստոցների և ապաստարանների խնդրիի լուծման վերաբերյալ, որպեսզի հատկացումներ արվեն, սակայն առաջարկները մնացել են թղթի վրա, հիմնական պատճառաբանությունն օրենսդրական բացն է կամ այն, որ համայնքը այդքան բյուջե չունի, որպեսզի, օրինակ,  բոլոր շենքերի նկուղները նորոգի և այլն:

Ավանեսովի խոսքով՝ կան շատ տարրական խնդիրներ, որոնց լուծումները օրենսդրական բացերի ու մեծ գումարների հետ կապ չունեն և հնարավոր է արագ լուծում տալ դրանց, օրինակ՝ այն, որ դռները պետք է դեպի դուրս բացվեն, դպրոցների առաջին հարկերի լուսամուտները ճաղավանդակներով չփակվեն և այլն:

«Վախենալու է՝ ինչպե՞ս են ԱԻՆ-ի ներկայացուցիչները բացառում ուժգին երկրաշարժերի և աղետի հնարավորությունը Հայաստանում,- նշեց Ավանեսովը՝ հավելելով, որ բնակչության իրազեկվածության առումով ևս խնդիրներ կան:

Մանրամասները՝ տեսանյութում: