30.06.2026 | 18:44
Թուրքիան գնահատում է SAMP-T և Patriot համակարգերի ձեռքբերման հնարավորությունը՝ իր հակաօդային պաշտպանությունն ամրապնդելու համար
ANCA-ն պահանջում է պատժել Պակիստանին ահաբեկչության ֆինանսավորման համար
Քաղաքականություն
17.02.2021 | 22:48
ԱՄՆ Հայ դատի հանձնախումբը (ANCA) Twitter-ի իր միկրոբլոգում մի շարք հրապարակումներ է արել՝ պահանջելով պատժել Պակիստանին ահաբեկչության ֆինանսավորման համար։
Մասնավորապես, ANCA-ն կոչ է անում FATF կազմակերպությանը Պակիստանին ներառել «սև ցուցակում»։
«ԱՄՆ ֆինանսների նախարարության ներկայացուցիչը FATF-ում պիտի ճնշում գործադրեր համաշխարհային այս հզոր կազմակերպության վրա՝ Պակիստանին ներառելու «սև ցուցակում» ահաբեկչության ֆինանսավորման համար։ Մասնավորապես, վարձկան-ջիհադիստների ֆինանսավորման համար, որոնք կռվում էին Ադրբեջանի կողմից Արցախի դեմ»,- ասվում է գրառման մեջ։
Ի դեպ, Հայ դատի հանձնախմբի այս նախաձեռնությանն անդրադարձել է հնդկական անգլալեզու WION հեռուստաալիքը։
Նշենք, որ FATF-ը միջակառավարական կազմակերպություն է, որը ստեղծվել է 1989 թվականին։ Այն զբաղվում է միջազգային ստանդարտների մշակմամբ՝ փողերի լվացման ու ահաբեկչության ֆինանսավորման դեմ պայքարում։ 2019-ից կազմակերպության անդամ է հանդիսանում 37 պետություն, երկու միջազգային կազմակերպություն, ինչպես նաև ներառում է դիտորդ 23 կազմակերպություն ու մեկ պետություն։
2018 թվականից Պակիստանը կազմակերպության «մոխրագույն ցուցակում» է։
Էմմա Չոբանյան
