19.12.2025 | 22:50
Իսրայելում ՌԴ քաղաքացի է ձերբակալվել Իրանի օգտին լրտեսության մեղադրանքով
ԵԽԽՎ-ն կոչ է արել անդամ երկրներին չխոչընդոտել ՀԿ-ների գործունեությունը
Քաղաքականություն
16.02.2021 | 18:28
ԵԽԽՎ-ն իր լիագումար նիստի ընթացքում բանաձև է ընդունել, որում ասվում է, որ քաղհասարակության դիրքերը թուլացել են որոշ անդամ երկրներում, ինչպիսիք են Ադրբեջանը, Ռուսաստանը և Թուրքիան, սահմանափակող օրենքների և կարգավորումների պատճառով: Դա մասնավորապես վերաբերում է արտերկրից ֆինանսավորում ստանալն արգելող օրենքներին։ Այս մասին ասվում է ԵԽԽՎ պաշտոնական կայքում։
Ֆրանսիան ներկայացնող պատգամավոր Ալեքսանդր Լուիսի զեկույցի հիման վրա ընդունված բանձևում՝ ԵԽԽՎ-ն կոչ է արել անդամ երկրներին «հավաքների և ազատ արտահայտման իրավունքը համապատասխանեցնել միջազգային իրավական չափանիշներին և չեղարկել կամ փոխել այն օրենքները, որոնք խոչընդոտում են ՀԿ-ների ազատ և անկախ աշխատանքին»:
«Կառավարությունները պետք է ձեռնպահ մնան նոր օրենքների ընդունումից, որոնք կհանգեցնեն ՀԿ-ների գործունեության ոչ անհրաժեշտ և անհամաչափ սահմանափակումների», – ասել են խորհրդարանականները` շեշտելով, որ Covid-19 համաճարակը չպետք է օգտագործվի նման սահմանափակումները արդարացնելու համար:
«Հասարակական կազմակերպությունները պետք է կարողանան ապահովել և օգտագործել ինչպես ներքին, այնպես էլ արտասահմանյան ծագմամբ ֆինանսական ռեսուրսները ՝ առանց խտրականության ենթարկվելու կամ խոչընդոտների հանդիպելու»,- հավելել են նրանք:
Վերջապես, ԵԽԽՎ-ն անդամ երկրներին կոչ է արել զերծ մնալ ոտնձգությունների ցանկացած ձևերից (դատական, վարչական կամ հարկային), հասարակական բացասական հայտարարություններից և հասարակական կազմակերպություններին ուղղված արատավոր արշավներից:
Տաթև Ֆռանգյան
