27.08.2026 | 20:02
ԱԺ-ն հաստատեց Կառավարության ծրագրի փոփոխությունների վերաբերյալ օրենքների նախագծերի փաթեթը
Ռեկորդային սառնամանիքներ ԱՄՆ-ում․ ավելի քան 1 մլն մարդ առանց լույսի է մնացել
Քաղաքականություն
15.02.2021 | 16:48
ԱՄՆ Տեխաս նահանգը հայտնի է իր անապատներով ու տաք քամիներով, սակայն այժմ այն ծածկվել է սառույցի հաստ շերտով։ Տեխասն առերեսվել է վերջին 30 տարվա ընթացքում գրանցված ամենացուրտ եղանակի հետ, իսկ որոշ շրջաններում հարյուրամյա ռեկորդ է սահմանվել, գրում է BBC news-ը։
Տեխասի որոշ մասերում ջերմաստիճանը հասել է -18C, իսկ եղանակի կանխատեսումները վկայում են այն մասին, որ ցուրտ եղանակը կպահպանվի ողջ շաբաթվա ընթացքում։
Կիրակի օրը ԱՄՆ նախագահ Ջո Բայդենը արտակարգ դրություն է հայտարարել Տեխասում, ինչը լիազորում է ԱՄՆ համապատասխան կառույցներին համակարգել նահանգում աղետների դեպքերի վերացումը:
Էլեկտրաէներգիայի պարբերական անջատումներ են իրականացվում՝ էլեկտրաէներգիայի սպառման նվազեցման նպատակով:
«Լուսացույցերը և այլ ենթակառուցվածքները կարող են ժամանակավորապես հոսանքազրկվել», – հայտարարություն է տարածել տեղի էլեկտրական ցանցերի համակարգողը։
Ամերիկյան ԶԼՄ-ները նաև տեղեկացրել են, որ ավելի քան 12 միլիոն սպառողներից Տեխասում փետրվարի 15-ի դրությամբ առանց լույսի է մնացել 1 միլիոն 75 հազար 85 բնակիչ: Տեխասի Էլեկտրատեխնիկական սարքավորման հուսալիության խնդիրներով զբաղվող խորհուրդը (ERCOT) փետրվարի 14-ին հաղորդել էր նահանգի հողմային սարքերի կեսի շարքից դուրս գալու մասին, որոնց տուրբինները սառցապատվել էին: Դա հանգեցրել է 12 հազար մեգավատտի կորստի:
Նահանգում հայտարարվել է երրորդ կարգի արտակարգ դրություն և սպառողներին կոչ է արվել կրճատել էլեկտրաէներգիայի օգտագործումը։ Տեղեկացվում է, նաև որ շուրջ 120 ավտովթար է գրանցվել։ Հարյուրավոր չվերթներ են չեղարկվել։
Տաթև Ֆռանգյան
