Քաղաքականություն
15.02.2021 | 13:55
Սիրիայի հակաօդային պաշտպանության ուժերը կանխել են իսրայելական բանակի ագրեսիան Դամասկոսի երկնքում, ենթադրաբար, իրանամետ զինյալների դիրքերին զանգվածային գրոհի ժամանակ։ Այս մասին փոխանցում է Aljazeera-ն՝ հղում կատարելով Սիրիայի Զինված ուժերի հայտարարությանը։
Պետական ԶԼՄ-ները դեռևս չեն բացահայտում երկրի երկնքում հակաօդային պաշտպանության մանրամասները։ Օդային գրոհի հետևանքով ենթադրյալ զոհերի մասին տեղեկություններ ևս չեն հաղորդվել։
Սիրիական բանակի հայտարարության մեջ ասվում է, որ իսրայելացի զինվորականները գրոհել են Գոլանի բարձունքների վրայով՝ Դամասկոսի ծայրամասում տեղակայված թիրախները խոցելու համար։ Նշվում է, որ Իսրայելի ռազմաօդային ուժերի կողմից արձակված հրթիռների մեծ մասը խոցվել է։
Aljazeera-ի աղբյուրների տվյալների համաձայն՝ Իսրայելի կողմից արձակված հերթական հրթիռները խոցել են Կիսվա քաղաքում բանակային դիվիզիան, որը տեղակայված է Սիրիայի մայրաքաղաքից 14 կմ հարավ, որտեղ տեղակայված են Իրանի աջակցությունը վայելող աշխարհազորայինները։
Հիշեցնենք՝ Իսրայելի բանակի Գլխավոր շտաբի պետ, գեներալ-լեյտենանտ Ավիվ Կոխավին անցյալ տարվա վերջին հայտարարել էր, որ իր երկրի կողմից իրականացված հրթիռակոծությունները դանդաղեցրել են Սիրիայում իրանական դիրքերի ամրապնդումը, որտեղ միայն 2020 թվականին խոցվել է ավելի քան 500 թիրախ։
Տաթև Ֆռանգյան
